అనంతపురం జిల్లా మడకశిరలో ఓ కుటుంబంలో.. పదిహేను రోజుల వ్యవధిలో అన్న, తమ్ముడు, తమ్ముని భార్య ప్రాణాలు కోల్పోయారు. 40 ఏళ్ల మహేష్ పెట్రోల్ బంక్ లో పని చేసేవాడు. కరోనా బారినపడి మే 16వ తేదీన ప్రాణాలు విడిచాడు. బాధ తట్టుకోలేక మరుసటి రోజు మహేశ్‌ అన్న నాగరాజు గుండెపోటుతో మరణించాడు. సోదరులైన కుటుంబ పెద్దలిద్దరినీ కోల్పోయి తీవ్ర బాధలో ఉన్న కుటుంబంలో కరోనా మరోసారి విషాదం నింపింది. కొవిడ్‌ కారణంగా మహేష్ భార్య వరలక్ష్మి ఈ నెల మొదటి వారంలో ప్రాణాలు విడిచింది.
మహేశ్‌, వరలక్ష్మి దంపతులకు ఇద్దరు కుమారులు ఉన్నారు. తల్లిదండ్రులను కోల్పోయిన వీరిద్దరినీ ప్రస్తుతం మహేశ్‌ వదిన చూసుకుంటోంది. ఆమెకు ముగ్గురు కన్నపిల్లలు ఉన్నారు. భర్తను, మరిదిని, తోటి కోడలను కోల్పోయి....తీవ్ర విషాదంలో ఉన్న ఆమె.....ఐదుగురు పిల్లల భవిష్యత్‌పై బెంగ పెట్టుకుంది. దిక్కుతోచని పరిస్థితుల్లో ఉన్న ఈ కుటుంబాన్ని ఆదుకోవాలని స్థానికులు కోరుతున్నారు.
ఇదీ చదవండీ.. మట్టిలో దాచిన మద్యం బిందె పట్టివేత.. ఒకరు అరెస్ట్
