NGT FIRES ON BRANDIX COMPANY : రాష్ట్రంలో గ్యాస్ లీకేజ్ ఘటనలకు కేరాఫ్ అడ్రస్గా నిలిచిన అనకాపల్లి జిల్లా అచ్యుతాపురం పూడిమడక రోడ్డులోని అపెరల్‌ పార్కులో ఉన్న బ్రాండిక్స్‌ కంపెనీకి ఎన్జీటీ భారీ జరిమానా విధించింది. గతేడాది జూన్‌ 3 నుంచి 12 వరకు గ్యాస్ లీకైన ఘటనల్లో 410 మంది, ఆగస్టు 2న 129 మంది మహిళా కార్మికులు అస్వస్థతకు గురయ్యారు. మొత్తంగా 539 మంది ఆస్పత్రి పాలయ్యారు. ఈ ఘటనలపై మీడియా కథనాలను ఎన్జీటీ సుమోటోగా స్వీకరించింది.
NGT FINE TO BRANDIX COMPANY IN GAS LEAKAGE INCIDENTS: "ప్రజల కోసం శాస్త్రవేత్తలు" అనే స్వచ్ఛంద సంస్థ సమర్పించిన నివేదికనూ తీసుకుంది. ప్రమాద ఘటనలపై ఆరుగురు నిపుణులతో కూడిన బృందాన్ని నియమించింది. ఆ నివేదికపై ఎన్జీటీ ఛైర్మన్‌ జస్టిస్‌ ఆదర్శకుమార్‌ గోయెల్‌, జస్టిస్‌ సుధీర్‌ అగర్వాల్‌, విషయ నిపుణుడు ప్రొఫెసర్‌ N.సెంథిల్‌తో కూడిన త్రిసభ్య ధర్మాసనం... బుధవారం విచారణ చేపట్టి లిఖితపూర్వక ఉత్తర్వులను శుక్రవారం వెలువరించింది.
పరిహారంగా పది కోట్లు: గ్యాస్ లీకై ఆసుపత్రిలో చేరిన 539 మంది కార్మికులకు లక్ష చొప్పున పరిహారం పొందే హక్కు ఉందని ఎన్జీటీ స్పష్టం చేసింది. కంపెనీ వార్షిక టర్నోవర్‌ వంద కోట్లు ఉంటుందని వారి న్యాయవాది తెలిపినందున...10 కోట్లు పరిహారంగా చెల్లించాలని ఆదేశించింది. ఆ మొత్తాన్ని కంపెనీ రెండు నెలల్లోగా పీసీబీ ఖాతాలో జమ చేయాలని స్పష్టంచేసింది. అలా చేయకపోతే పీసీబీ కఠిన చర్యలు తీసుకోవచ్చని తేల్చిచెప్పింది. అవసరమైతే కంపెనీని మూసేయవచ్చంది .
10 కోట్లలో 5 కోట్లను బాధితులకు పరిహారం చెల్లించేందుకు పీసీబీ ఆంధ్రప్రదేశ్‌ రాష్ట్ర న్యాయసేవా సంస్థకు అందజేయాలని స్పష్టం చేసింది. పరిహారం ఇవ్వడానికి 5 కోట్లు చాలకపోతే.. న్యాయ సేవా సంస్థకు మరిన్ని నిధులివ్వాలంది. చెల్లించిన తర్వాత సంస్థ వద్ద డబ్బులు మిగిలితే.. తిరిగి పీసీబీకి అందించాలని నిర్దేశించింది. పరిహారం చెల్లించేందుకు బాధితులను గుర్తించడంతో పాటు... పంపిణీకి కార్యాచరణ రూపొందించాలని ఏపీ న్యాయసేవా సంస్థకు విజ్ఞప్తి చేసింది.
పరిహారం చెల్లించగా మిగిలిన నిధులను పర్యావరణ పరిరక్షణ, పర్యావరణ పెంపు పనులకు వెచ్చించాలని స్పష్టంచేసింది. పర్యావరణ పరిరక్షణ చర్యల్లో భాగంగా కంపెనీ ఆవరణలో గ్యాస్ లీక్‌ ఘటనలను గుర్తించే పరికరాలు, ప్రమాద తీవ్రతను తగ్గించే పరికరాలు అమర్చడంతో పాటు... మొక్కల పెంపకం, ఇతర చర్యలకు ఆ నిధులు వెచ్చించాలని సూచించింది. ఈ మొత్తం వ్యవహారంలో కంపెనీతో పాటు ఇతర భాగస్వాములను కలుపుకొని 6 నెలల్లో పనులన్నింటినీ పీసీబీ పూర్తిచేయాలని ఎన్జీటీ ఉత్తర్వుల్లో పేర్కొంది.
ఇవీ చదవండి:
