తెలంగాణ.. రాంపల్లి ఆర్‌ఎల్‌నగర్‌కు చెందిన ఫార్మసీ విద్యార్థిని బుధవారం సాయంత్రం కళాశాల నుంచి ఇంటికి తిరిగొచ్చే సమయంలో 'తనను ఆటో డ్రైవర్‌ కిడ్నాప్‌ చేసి ఎక్కడికో తీసుకెళ్తున్నట్లు' తల్లికి ఫోన్‌చేసి చెప్పింది. ఆమె డయల్‌ 100కు సమాచారం ఇవ్వడంతో పోలీసులు సెల్‌ఫోన్‌ సంకేతాల ఆధారంగా అన్నోజీగూడ ఓఆర్‌ఆర్‌ సర్వీస్‌ రోడ్డు దగ్గర బాధితురాలిని గుర్తించి ప్రైవేటు ఆసుపత్రికి తరలించారు. స్పృహలోకి వచ్చిన తర్వాత 'తనపై కొందరు ఆటో డ్రైవర్లు సామూహిక అత్యాచారానికి పాల్పడ్డారని' ఆమె చెప్పడంతో అనుమానంతో నలుగురు ఆటో డ్రైవర్లను గురువారం తెల్లవారుజామున పోలీసులు అదుపులోకి తీసుకున్నారు.
ఒంటరిగానే సంచరించిన యువతి
బాధితురాలు చెప్పిన వివరాల ఆధారంగా పోలీసులు గురువారం రాత్రి సీన్‌ రీ-కన్‌స్ట్రక్షన్‌ చేశారు. క్షేత్రస్థాయి వాస్తవాలకు, బాధితురాలు చెప్పిన వివరాలకు పొంతన కుదరకపోవడంతో అనుమానంతో మరోసారి పరిసర ప్రాంతాల్లోని సీసీటీవీ ఫుటేజీలను సేకరించి విశ్లేషించారు. ఆ క్రమంలోనే బాధితురాలు సాయంత్రం 6 గంటల నుంచి 7.30 గంటల వరకు ఘట్కేసర్, యంనంపేట్‌, అన్నోజీగూడ తదితర ప్రాంతాల్లో ఒంటరిగానే సంచరించినట్లు గుర్తించారు. ఆ సమయంలో పోలీసుల అదుపులో ఉన్న ఆటో డ్రైవర్ల సెల్‌ఫోన్‌ సంకేతాలు ఆ ప్రాంతాల్లో లేవనీ తేల్చారు. ఆ కోణంలో మరోసారి బాధితురాలిని ప్రశ్నించగా 'చీకటి పడినా ఇంటికి ఎందుకు రాలేదని తల్లి పదేపదే ఫోన్‌ చేస్తుండటంతో ఆటో డ్రైవర్‌ ఎక్కడికో తీసుకెళ్లాడని' చెప్పానని యువతి అంగీకరించినట్టు తెలిసింది.
అక్కడికెందుకెళ్లిందో?
ఆమెపై అత్యాచారం జరిగినట్టు వైద్యులు ధ్రువీకరించిన నేపథ్యంలో పోలీసులు బుధవారం బాధితురాలిని గుర్తించిన అన్నోజీగూడ పరిసరాల్లో మరోసారి గాలించారు. అత్యాచారం జరిగిందనడానికి ఎలాంటి ఆధారాలు లభించలేదు. అత్యాచారం ఎక్కడ జరిగిందనే ప్రశ్నకు బాధితురాలు కూడా పొంతనలేని సమాధానాలు చెబుతుండటంతో ఆమె మానసిక స్థితిపై పోలీసులకు అనుమానం కలిగింది. ఆ కోణంలో కుటుంబ సభ్యులు, స్నేహితులను ఆరా తీశారు. గతంలో యువతితో సన్నిహితంగా మెలిగిన వ్యక్తిని విచారించారు. ‘గతంలోనూ సదరు యువతి తనను ఎవరో కిడ్నాప్‌ చేశారంటూ నాకు ఫోన్‌ చేసింది. తీరాచూస్తే అది నిజం కాదని తేలింది. అప్పట్నుంచి ఆమెను దూరంపెట్టా’ అని అతను చెప్పడంతో పోలీసులు కంగుతిన్నారు. మరి అత్యాచారం జరిగినట్లు వైద్యులు ఎందుకు నివేదిక ఇచ్చారు? యువతి ఒంటరిగా ఆయా ప్రాంతాల్లో ఎందుకు సంచరించింది? అనే కోణంలో దర్యాప్తుసాగిస్తున్నారు. మొత్తంగా బాధితురాలు తమను తప్పుదోవ పట్టించినట్లు పోలీసులు శుక్రవారం ఓ నిర్ణయానికి వచ్చినట్టు సమాచారం.
ఇవీ చదవండి: ఎన్నికల అక్రమాలపై చర్యలు తీసుకోండి: ఎస్‌ఈసీకి హైకోర్టు ఆదేశం
