పర్యావరణహితంగా దీపావళి... ప్రతి ఇంటా జరగాలి

విజయానికి ప్రతీకగా నిలిచే పండగను... దీపాలతో ప్రతి ఇల్లు వెలుగులు జిమ్మేలా చేసుకుందాం అంటూ పిలుపునిస్తున్నారు ఆ విద్యార్థినులు. పర్యావరణహితమైన ప్రమిదలు తయారు చేసి వాటి విక్రయం ద్వారా వచ్చిన సొమ్మును అనాథల కోసం ఖర్చు చేస్తామంటున్నారు.

వెలుగుల పండుగ దీపావళిని పర్యావరణహితంగా జరుపుకోవాలని పిలుపునిస్తున్నారు విజయవాడ విద్యార్థినులు. పర్యావరణాన్ని పరిరక్షించి... అనాథ బాలల్లో సంతోషాన్ని నింపేందుకు వినూత్న కార్యక్రమం నిర్వహించారు. విజయవాడకు చెందిన నలంద డిగ్రీ కళాశాల విద్యార్థినులు బియ్యపు పిండితో ప్రమిదలు చేసి ఆకర్షణీయంగా తీర్చిదిద్దారు. వారం పాటు శ్రమించి ప్రమిదలకు హంగులద్దారు. సంప్రదాయ వస్త్రధారణలో దీపాల వెలుగులతోపాటు ఘుమ ఘుమలాడే వంటకాలతో దీపావళి శోభ ముందే తీసుకొచ్చారు. ప్రమిదలతో ప్రదర్శన ఏర్పాటు చేసి.. వాటి విక్రయాల ద్వారా వచ్చిన ఆదాయాన్ని అనాథల కోసం ఖర్చు చేయనున్నారు. వారితో కలిసి ఆనందంగా పండుగ జరుపుకుంటామని చెబుతున్నారీ చదువుల సరస్వతులు.