రాష్ట్ర ఎన్నికల కమిషనర్గా విశ్రాంత ఐఏఎస్ అధికారి నీలం సాహ్ని(SEC Neleam sahni)ని నియమించడాన్ని సవాలు చేస్తూ హైకోర్టులో పిల్ దాఖలైంది. ఆమె నియామకానికి సంబంధించి పంచాయతీరాజ్ శాఖ ఈ ఏడాది మార్చి 28 న జారీచేసిన జీవో 20ని రద్దు చేయాలని కోరుతూ విజయవాడకు చెందిన జి.రామకృష్ణ ఈ వ్యాజ్యాన్ని దాఖలు చేశారు. రాష్ట్ర ఎన్నికల కమిషనర్ నియామకానికి ముగ్గురు పేర్లతో ప్రభుత్వం తయారు చేసిన ప్యానల్ను రాజ్యాంగ విరుద్ధమైనదిగా ప్రకటించాలని కోరారు.
ప్రభుత్వ ప్రధాన కార్యదర్శి , పంచాయతీరాజ్ శాఖ ముఖ్య కార్యదర్శి , రాష్ట్ర ఎన్నికల సంఘం కార్యదర్శి , వ్యక్తిగత హోదాలో విశ్రాంత ఐఏఎస్ నీలం సాహ్నిని ప్రతివాదులుగా పేర్కొన్నారు. హైకోర్టు ప్రధాన న్యాయమూర్తి జస్టిస్ ఏకే గోస్వామి, జస్టిస్ ఎన్.జయసూర్యతో కూడిన ధర్మాసనం ఈ వ్యాజ్యంపై విచారణ జరిపింది. పిటిషనర్ తరపు న్యాయవాది వాదనలు వినిపిస్తూ.. అదనపు వివరాల్ని దాఖలు చేశానన్నారు. ధర్మాసనం స్పందిస్తూ .. ప్రధాన పిటిషన్లో ఆ వివరాల్ని పొందుపరచకుండా ప్రత్యేకంగా వేయడం ఏమిటని ప్రశ్నించింది. గవర్నర్ అధికారాలతో ముడిపడి ఉన్న ఇలాంటి విషయంలో పూర్తి సమాచారం లేకుండా వ్యాజ్యం దాఖలు చేయడం సరికాదంది. న్యాయవాది అభ్యర్థన మేరకు విచారణను వచ్చే వారానికి వాయిదా వేసింది.
ఇదీ చదవండి:
