బెజవాడ దుర్గమ్మ సన్నిధిలో ఆషాడం సారె ఎంతగా ప్రాచుర్యం పొందిందో అందరికీ తెలిసిందే. అయితే దాని వెనక ఉన్న ఆలోచన ఎవరిచ్చారనేది మాత్రం చాలామందికి తెలియదు. 2017లో ఆషాడం సారె కార్యక్రమం దుర్గగుడిలో మొదలైంది. అప్పట్లో దేవాదాయశాఖ మంత్రిగా ఉన్న మాణిక్యాలరావుదే ఈ ఆలోచన.
రద్దీ పెరిగింది...
అమ్మవారి దర్శనానికి వచ్చిన సమయంలో అప్పటి ఆలయ ఈవో సూర్యకుమారితో ఈ ఆలోచన చెప్పారు. సహజంగా ఆషాడ మాసంలో ఇంద్రకీలాద్రిపై భక్తుల రద్దీ తక్కువగా ఉంటుంది. ఆ సమయంలో భక్తుల సంఖ్యను పెంచేందుకు ఆషాడం సారె కార్యక్రమం ఉపయోగపడింది. ఆయన ఆలోచనకు తగ్గట్లే మహిళలు పెద్దఎత్తున ఆషాడం సారె తీసుకురావటం మొదలుపెట్టారు. వివిధ ఆలయాలతో పాటు గ్రామాలు, పట్టణాల్లోని భక్త సమాజాలు ఆషాడం సారెను అమ్మవారికి సమర్పిస్తుంటారు. ఇలా బృందాలుగా వచ్చిన వారికి ఆలయ అధికారులు ప్రత్యేకంగా దర్శనం ఏర్పాట్లు కూడా చేశారు. ఆలయ ఆదాయం పెరిగేందుకు కూడా ఈ కార్యక్రమం దోహదపడింది. అయితే మాణిక్యాలరావు ఎక్కడా కూడా ఈ ఆలోచన తనదని బయటకు చెప్పలేదు.
ఇంద్రకీలాద్రితో పాటు మిగతా ఆలయాల్లోనూ ఆధ్యాత్మికత కార్యక్రమాలు పెంచే విషయంలో ఆయన సలహాలు అమూల్యమని అధికారులు గుర్తు చేసుకుంటారు. ఆర్.ఎస్.ఎస్ నేపథ్యం ఉండటంతో ఆయనకు సహజంగానే భక్తి ఎక్కువ. అందుకే ఆలయాల పవిత్రత, భక్తుల మనోభావాలు దెబ్బతినకుండా ఉండాలని భావించేవారు. కృష్ణా పుష్కరాల సమయంలో విజయవాడలో కొన్ని ఆలయాలను తొలగించాల్సి వచ్చింది. ఆ సమయంలో మంత్రిగా ఉన్న మాణిక్యాల రావు స్వయంగా రంగంలోకి దిగారు. ఉద్రిక్తతలకు అవకాశం ఇవ్వకుండా ఆలయాలను ప్రభుత్వం తరపున నిర్మిస్తామని చెప్పటం ద్వారా వివాదానికి చోటు లేకుండా చూశారు.
దేవదాయశాఖ మంత్రిగా సేవలందించిన పైడికొండల మాణిక్యాలరావు కరోనా వైరస్ బారిన పడి మృతి చెందారు. మంత్రిగా ఆయన చేసిన సేవలను పలువురు గుర్తు చేసుకుంటున్నారు.
ఇదీ చదవండి
