Senior citizens Difficulties: రాష్ట్రంలో ప్రభుత్వం ఇచ్చే పింఛన్‌తోనే జీవనం గడిపే వృద్ధులు ఉన్నారు. అయినవాళ్ల నిరాదరణ వల్ల ఆర్ధిక కష్టాలు పడేవారెందరో ఉన్నారు. ఇలాంటి వాళ్లు ఆసుపత్రులకు... ఇతర అవసరాలకు సుదూర ప్రాంతాలకు ప్రయాణాల్లో భారం పడకుండా గత ప్రభుత్వం బస్సులు, రైళ్లలో రాయితీలు కల్పించింది. సీనియర్ సిటిజన్లకు దూరంతో సంబంధంలేకుండా అన్ని బస్సుల్లో టికెట్‌పై 25శాతం రాయితీ అమలు చేస్తూ వచ్చారు. కొవిడ్ రాకతో వృద్దుల సంతోషం ఆవిరైంది. రెండేళ్ల క్రితం ఆర్టీసీ రాయితీలు ఎత్తివేసింది. కరోనా వ్యాప్తి తగ్గగానే పునరుద్దరిస్తామని అప్పట్లో అధికారులు చెప్పారు. కొవిడ్ వ్యాప్తి తగ్గుముఖం పట్టినప్పుడల్లా రాయితీలు పునరుద్దరించాలని వృద్దులు కోరుతున్నారు. కానీ నష్టాలు పేరు చెప్పిన ఆర్టీసీ.. రాయితీలను పునరుద్దరించడం లేదు. ఫలితంగా ఆర్టీసీ బస్సుల్లో వృద్ధులుచార్జీ చెల్లించి ప్రయాణించాల్సి వస్తోంది. రాయితీలపై ఆర్టీసీ అధికారులకు, ప్రభుత్వానికి వినతులు ఇచ్చినా పట్టించుకోవడం లేదని ఆవేదన వ్యక్తం చేస్తున్నారు.
ఆర్థికంగా భారమవుతుందంటున్న వృద్ధులు
రైళ్లలో ప్రయాణానికీ సీనియర్ సిటిజన్లు కష్టాలు పడుతున్నారు. కొవిడ్ వ్యాప్తి తగ్గాక రాయితీలు పునరుద్ధరించాల్సి ఉండగా నెలలు అవుతున్నా అలాంటి చర్యలేవీ తీసుకోలేదు. రైళ్లు, బస్సుల్లో రాయితీలు ఇవ్వకపోవడం వల్ల కొందరు ప్రైవేటు వాహనాలను ఆశ్రయిస్తున్నారు. ఇది ఆర్థికంగా తమకు భారమవుతోందని ఆవేదన వ్యక్తం చేస్తున్నారు. రాయితీల పునరుద్దరణపై వీలైనంత త్వరగా నిర్ణయం తీసుకుని అమలు చేయాలని సీనియర్ సిటిజన్లు కోరుతున్నారు.
వృద్ధులకు ఛార్జీల్లో రాయితీ పునరుద్ధరించక పోవడంపై హైకోర్టు ఆగ్రహం...
వృద్ధులకు ఆర్టీసీ బస్సులు, రైలు ఛార్జీలలో రాయితీని ఎందుకు పునరుద్ధరించలేదో చెప్పాలని రైల్వేబోర్డ, ఆర్టీసీ అధికారులను హైకోర్టు ఆదేశించింది. కొవిడ్ సమయంలో రద్దు చేసిన రాయితీలను... తీవ్రత తగ్గాక కూడా ఎందుకు అమలు చేయడంలేదని మండిపడింది. ప్రస్తుతం అనుసరిస్తున్న విధానం ఏమిటో చెప్పాలని స్పష్టంచేసింది. హైకోర్టు ప్రధాన న్యాయమూర్తి జస్టిన్ ప్రశాంతకుమార్ మిశ్రా, జస్టిస్ ఎం.సత్యనారాయణమూర్తితో కూడిన ధర్మాసనం ఆదేశాలు జారీచేసింది. రైలు, బస్సు ఛార్జీల్లో వృద్ధులకు ఇచ్చే రాయితీని కొవిడ్ కారణంగా రద్దు చేశారని, సాధారణ పరిస్థితులు వచ్చినా రాయితీ పునరుద్ధరించలేదని పేర్కొంటూ శ్రీకాకుళానికి చెందిన జీఎన్ కుమార్ హైకోర్టులో పిల్ వేశారు.
న్యాయవాది పీపీఎన్ఎస్ శ్రీకాంత్ వాదనలు వినిపిస్తూ పలువురి విషయంలో రాయితీని పునరుద్ధరించినా వృద్ధుల విషయంలో జరగలేదన్నారు. ఈ తరహా చర్య వివక్ష చూపడమేనన్నారు. ఛార్జీల్లో రాయితీ ఇస్తే వృద్ధులకు కొంత అసరాగా ఉంటుందన్నారు. ధర్మాసనం స్పందిస్తూ వృద్ధులు సులువుగా కొవిడ్ బారినపడతారు కాబట్టి ప్రయాణాల సంఖ్యను తగ్గించాలని ప్రభుత్వం రాయితీని నిలిపేసిందని పేర్కొంది. ప్రస్తుతం కరోనా పరిస్థితులు మెరుగుపడిన నేపథ్యంలో రాయితీని ఎందుకు పునరుద్ధరణ చేయలేదో చెప్పాలని అధికారులను ఆదేశిస్తూ విచారణను... ఈనెల 29 కి వాయిదా వేసింది.
ఇదీ చదవండి:వృద్ధులకు ఛార్జీల్లో రాయితీ ఎందుకు పునరుద్ధరించలేదు..?: హైకోర్టు
