క్యూనెట్లో ఇప్పటివరకు రూ.5 వేల కోట్ల మేర మోసం జరిగిందని తెలంగాణలోని సైబరాబాద్ సీపీ సజ్జనార్ తెలిపారు. 38 కేసులు నమోదు చేసి.. 70 మందిని అరెస్ట్ చేసినట్లు వెల్లడించారు. క్యూనెట్ కేసులో సినీ ప్రముఖులకూ నోటీసులు పంపించామని పేర్కొన్నారు.
దేశవ్యాప్తంగా దిల్లీ, మహారాష్ట్ర, బెంగళూరులో క్యూనెట్పై కేసులు నమోదైనట్లు సజ్జనార్ వివరించారు. 206(5) కంపెనీ యాక్ట్ 2013 ప్రకారం ఎంసీఏ (కార్పొరేట్ వ్యవహారాల మంత్రిత్వశాఖ) ఆధ్వర్యంలో విచారణ జరిగినట్లు తెలిపారు. క్యూనెట్పై చర్యలు తీసుకోవాలని నేషనల్ కంపెనీ లా ట్రైబ్యునల్కు ఎంసీఏ ఫిర్యాదు చేసిందన్నారు. క్యూనెట్ కేసులో 12 మందికి ఎల్వోసీ జారీ చేశామన్నారు. క్యూనెట్ అనుబంధ సంస్థ విహాన్‌ సెల్లింగ్‌ కార్యాలయాన్ని సీజ్ చేసినట్లు తెలిపారు.
సాఫ్ట్వేర్ ఉద్యోగులే లక్ష్యంగా క్యూనెట్ కుంభకోణం జరిగిందన్నారు. మంచి అవకాశం పేరిట నిరుద్యోగులనూ మోసగించినట్లు పేర్కొన్నారు. క్యూనెట్ బాధితులు లక్షల్లో ఉన్నారన్నారని.. ప్రజలెవరూ చేరవద్దని సీపీ సూచించారు.
