చిత్తూరు, ప్రకాశం జిల్లాల్లో కరోనా కట్టడికి గట్టి చర్యలు తీసుకోవాలని కేంద్రప్రభుత్వం ఆయా జిల్లాల యంత్రాంగాలను ఆదేశించింది. కరోనా కట్టడికి మరిన్ని చర్యలు తీసుకోవాలంటూ ఐదు రాష్ట్రాల్లోని 15 జిల్లాల అధికారులకు కేంద్ర ఆరోగ్యశాఖ ఆదేశాలిచ్చింది. వైరస్‌ వ్యాప్తిని అరికట్టడానికి, మరణాల రేటును 1 శాతం దిగువకు తీసుకురావడానికి కృషి చేయాలని సూచించింది.
ఆయా జిల్లాల్లో కేసులు ఎక్కువగా నమోదవుతున్నందునే ఈ సూచనలు చేసినట్లు కేంద్ర ఆరోగ్య శాఖ కార్యదర్శి రాజేశ్‌ భూషణ్‌ వెల్లడించారు. కంటైన్మెంట్‌ జోన్లను, హోమ్‌ ఐసోలేషన్‌ కేసులను కట్టుదిట్టంగా పర్యవేక్షించడం, కరోనా పరీక్షల సంఖ్యను పెంచడం , సత్వర వైద్యం అందిచడం వంటి చర్యలు చేపట్టాలని కోరామన్నారు
