ఆంధ్రప్రదేశ్లో మరో రూపాయి చొప్పున పెట్రోలు, డీజిల్పై సెస్ విధించేందుకు రాష్ట్ర ప్రభుత్వం సమాయత్తం అవుతోంది. దీనికి సంబంధించి వాణిజ్య పన్నులశాఖ అధికారులు కార్యాచరణ సిద్ధం చేస్తున్నారు. సెస్ పెంపు ప్రతిపాదనపై ఇప్పటికే రాష్ట్ర మంత్రివర్గంలోనూ నిర్ణయం తీసుకున్నట్టు తెలుస్తోంది. పెట్రోలు, డీజిల్ లీటరుపై రూపాయి చొప్పున సెస్ విధించాలని ప్రభుత్వ ఆలోచన చేస్తోంది. త్వరలోనే దీనిపై అధికారిక ఉత్తర్వులు వెలువడనున్నాయి. అదనంగా లీటరుపై రూపాయి చొప్పున సెస్ విధించటం ద్వారా రూ.600 కోట్లు మేర ఆదాయం వస్తుందని ప్రభుత్వం అంచనా వేస్తోంది.
సెస్ ఆదాయం రహదారుల కోసం
సెస్ ద్వారా వచ్చే ఆదాయాన్ని రహదారుల నిర్మాణం కోసం వెచ్చించాలని ప్రభుత్వం భావిస్తోంది. ప్రస్తుతం ముడి చమురుపై రాష్ట్ర ప్రభుత్వం 5 శాతం మేర వ్యాట్ విధిస్తోంది. పెట్రోల్పై 31 శాతం మేర వ్యాట్ను, అదనంగా 4 రూపాయల మేర అదనపు పన్నును వసూలు చేస్తున్నారు. అటు డీజిల్ పై 22.5 శాతం మేర వ్యాట్తో పాటు అదనంగా 4 రూపాయల పన్నును వాణిజ్య పన్నుల శాఖ వసూలు చేస్తోంది. ప్రస్తుతం కొవిడ్ కారణంగా రాష్ట్రానికి రావాల్సిన వేర్వేరు ఆదాయాలు కోల్పోవటంతో అదనంగా ఆదాయాన్ని రాబట్టేందుకు పెట్రోలు డీజిల్పై లీటరుకు ఒక్క రూపాయి చొప్పున వేర్వేరుగా సెస్ను విధించాలని నిర్ణయించారు.
త్వరలో ఉత్తర్వులు
వాస్తవానికి పెట్రోలు, డీజిల్పై ప్రభుత్వం విధిస్తున్న వ్యాట్తో పాటు అదనపు పన్నులతో 4480 కోట్ల రూపాయల మేర ఆదాయం రావాల్సి ఉన్నప్పటికీ ఏప్రిల్ నెలకు కేవలం రూ.1323 కోట్లు మాత్రమే పన్నులు వచ్చినట్టు ప్రభుత్వం చెబుతోంది. దీంతో ఇటీవలే సహజవాయువు పైనా వ్యాట్ను 24.5 శాతం మేర వసూలు చేయాలని నిర్ణయించింది. మరింత ఆదాయం కోసం పెట్రోలు, డీజిల్ పైనా 1 శాతం మేర సెస్ను విధించనున్నారు. దీనికి సంబంధించి అధికారికంగా ఉత్తర్వులు వెలువడనున్నాయి.
ఇదీ చదవండి : ఉండిలో అవినీతి పెరిగిపోయింది... వైకాపా నేత తిరుగుబాటు దీక్ష
