భాజపాకు 200 సీట్లు దాటవు: కేఏ పాల్
భాజపాయేతర పక్షాల తీరుపై.. ప్రజాశాంతి పార్టీ అధ్యక్షుడు కేఏ పాల్ అభ్యంతరం వ్యక్తం చేశారు. సార్వత్రిక ఎన్నికలను బహిష్కరించాలని తాను పిలుపునిస్తే.. ఏ రాజకీయ పార్టీ స్పందించలేదని దిల్లీలో వ్యాఖ్యానించారు. కౌంటింగ్ రోజున.. ఈవీఎంలకంటే ముందు వీవీ ప్యాట్లు లెక్కించాలన్న 22 రాజకీయ పార్టీల విజ్ఞప్తిని ఈసీ తిరస్కరించడాన్ని ఈ సందర్భంగా ప్రస్తావించారు. ప్రజాస్వామ్యంలో ఇలాంటి పద్ధతి మంచిది కాదన్నారు. ఎగ్జిట్ పోల్స్ నిజమయ్యే అవకాశాలు తక్కువని.. భాజపాకు 200కు మించి సీట్లు వచ్చే పరిస్థితి లేదని అంచనా వేశారు. తమ పార్టీ అభ్యర్థుల బీ ఫామ్లు ఎత్తుకెళ్లారని మరోసారి ఆరోపించారు. 30 నియోజకవర్గాల్లో రీ పోలింగ్ చేయాలని ఈసీని డిమాండ్ చేశారు.
