వివాహ వేడుకల్లో అపశృతి - ప్రమాదవశాత్తు బాణాసంచా పేలి తీవ్ర నష్టం

Fireworks Burst During the Wedding Ceremony : పల్నాడు జిల్లా నరసరావుపేటలోని అరండల్‌ పేటలో ఓ వివాహ వేడుకల్లో అపశృతి చోటుచేసుకుంది. పెళ్లి సంబరాల్లో బాణాసంచా కాలుస్తుండగా ప్రమాదవశాత్తు ఆటోలో ఉన్న టపాసులపై నిప్పు రవ్వలు పడ్డాయి. దీంతో ఒక్కసారిగా టపాకాయలు పేలడంతో  భారీగా మంటలు చెలరేగాయి. ప్రమాదంలో పెళ్లి మండపం, ఆటో, ద్విచక్రవాహనం పూర్తిగా దగ్ధమయ్యాయి. వెంటనే అప్రమత్తమైన స్థానికులు మంటలను అదుపు చేశారు. ఆటోలో 4 లక్షల రూపాయలు విలువ చేసే బాణాసంచా ఉండటం వల్లే ప్రమాదం జరిగిందని వివాహ నిర్వహకులు తెలిపారు. 

ప్రమాదంలో ఎటువంటి ప్రాణనష్టం జరగలేదని స్థానికులు వెల్లడించారు. ప్రమాద తీవ్రత ఎక్కువగా ఉండటంతో  పరిసర ప్రాంతాల్లో దట్టమైన పొగలు వ్యాపించాయి. అయితే ఒక్కసారిగా పేలుళ్లు సంభవించడంతో  స్థానికులు భయభ్రాంతులకు గురయ్యారు. సమాచారం తెలుసుకున్న స్థానిక నియోజకవర్గ తెలుగుదేశం ఇంఛార్జ్ చదలవాడ అరవిందబాబు బాధితులను పరామర్శించారు. అయితే ఈ ప్రమాదంలో ఎవరికీ ఏమీ కాకపోవడంతో అందరూ ఊపిరి పీల్చుకున్నారు.