World Telugu Writers Conference For Second Day In Vijayawada : పిల్లల మనోవికాసానికి తోడ్పడేలా కనీసం ప్రాథమిక విద్య వరకు తెలుగులోనే బోధన జరగాలని, తెలుగు మాధ్యమంలో చదివిన వారికి ప్రోత్సాహకంగా ప్రభుత్వ ఉద్యోగాల్లో 5% రిజర్వేషన్‌ కల్పించాలని ప్రపంచ తెలుగు రచయితల మహాసభ తీర్మానించింది. విజయవాడలోని కేబీఎన్‌ కళాశాలలో రెండురోజుల పాటు నిర్వహించిన మహాసభల ముగింపు కార్యక్రమం ఆదివారం సాయంత్రం జరిగింది.
ఈ సందర్భంగా నిర్వహించిన పలు సదస్సుల్లో వక్తలు తెలుగు భాషా వికాసానికి చేసిన సూచనలను తీర్మానాల రూపంలో ప్రవేశపెట్టారు. ప్రపంచ తెలుగు రచయితల సంఘం ప్రధాన కార్యదర్శి డాక్టర్‌ పూర్ణచందు 18 తీర్మానాలను సభ ముందు ఉంచగా, సభికులు కరతాళధ్వనులతో ఆమోదించారు. ఈ తీర్మానాలు అమలు చేయాలని కోరుతూ రాష్ట్ర సాంస్కృతిక, పర్యాటక శాఖ మంత్రి కందుల దుర్గేశ్‌కు అందజేశారు. తీర్మానాల్లోని ముఖ్యాంశాలు.
- బాలల మనోవికాసానికి తోడ్పడేలా కనీసం ప్రాథమిక విద్య వరకు తెలుగులోనే బోధన జరగాలి.
- తెలుగు మాధ్యమంలో చదివిన విద్యార్థులకు ప్రభుత్వ ఉద్యోగాల్లో 5% రిజర్వేషన్‌ కల్పించాలి.
- వృత్తులు, జీవన విధానాల్లో కనుమరుగైపోతున్న తెలుగు పదాలను వెలికితీసి, ప్రాచుర్యం కల్పించాలి. తెలుగు భాషాభిమానాన్ని కలిగించే రచనలను ప్రోత్సహించాలి.
- ఆంగ్ల పదాలకు సమానమైన, సహజమైన తెలుగు పదాలు సృష్టించాలి.
- ఇంటా, బయటా, సామాజిక జీవన వ్యవహారాల్లో తెలుగు వినియోగాన్ని పెంచాలి.
- డిగ్రీ స్థాయిలో అన్ని సెమిస్టర్లలో తెలుగును ఒక పాఠ్యాంశంగా బోధించాలి.
- ఇంజినీరింగ్, మెడిసిన్, తదితర కోర్సులను కూడా మాతృభాషలోనే బోధించాలనే కేంద్ర ప్రభుత్వ విధానం అమలుకు రాష్ట్ర ప్రభుత్వం చర్యలు తీసుకోవాలి.
- గత ప్రభుత్వం తెలుగు భాషను అణచివేసేందుకు జారీ చేసిన జీవో 85పై వైఎస్సార్సీపీ హయాంలో సుప్రీం కోర్టులో వేసిన స్పెషల్‌ లీవ్‌ పిటిషన్‌ను వెంటనే ఉపసంహరించుకోవాలి.
- హైకోర్టులో మాతృభాషలోనే వాద ప్రతివాదనలు, తీర్పులు ఉండాలి. ఉభయ తెలుగు రాష్ట్ర ప్రభుత్వాలు ఈ మేరకు స్పందించాలి.
- చట్టాలను తెలుగులోకి అనువదించడంతో పాటు పారిభాషిక పదకోశాలను తయారు చేయించాలి.
- గతంలో తెలుగుదేశం ప్రభుత్వం ఏర్పాటు చేసిన తెలుగు భాషాభివృద్ధి ప్రాధికార సంస్థను పటిష్ఠపరిచి నిధులు కేటాయించాలి.
- పాలనా వ్యవహారాలు, ప్రభుత్వ ఉత్తర్వులు తెలుగులోనే జారీ చేసేందుకు గట్టి చర్యలు తీసుకోవాలి.
- తెలుగు అకాడమీని ‘తెలుగు- సంస్కృత అకాడమీ’గా మార్చడం వల్ల ప్రాథమిక లక్ష్యం దెబ్బతింది. తెలుగు అకాడమీ పూర్వ వైభవానికి కృషి చేయాలి.
- ఎన్టీఆర్‌ హయాంలో నెలకొల్పిన పొట్టి శ్రీరాములు తెలుగు విశ్వవిద్యాలయాన్ని రాష్ట్ర విభజన సందర్భంగా షెడ్యూల్‌ 10 జాబితాలో చేర్చారు. దీని విభజన ఇంకా అపరిష్కృతంగా ఉంది. ఈ సమస్య పరిష్కారానికి రాష్ట్ర ప్రభుత్వం చొరవ తీసుకోవాలి.
- సమగ్ర లక్ష్యాలు, నిధులతో వివిధ అకాడమీలను పటిష్ఠపరచాలి. కళల పరిరక్షణ, పరిశోధన, పరివ్యాప్తికి సాంస్కృతిక విశ్వవిద్యాలయం ఏర్పాటు చేయాలి.
- రాష్ట్ర విభజన తర్వాత ఏపీలో స్టేట్‌ లైబ్రరీ, స్టేట్‌ ఆర్కియాలజీ మ్యూజియం, స్టేట్‌ ఆర్కైవ్స్‌ వంటి సంస్థలను ఏర్పాటు చేయాలి.
- తెలుగు కళారూపాలను, దృశ్య కళలను కాపాడేందుకు భాషా విధానాన్ని, సాంస్కృతిక విధానాన్ని రూపొందించి రెండు తెలుగు రాష్ట్రాలు ప్రకటించాలి.
"ప్రజల భాషలోనే న్యాయపాలన జరగాలి"- మహాసభల వేదికగా పిలుపునిచ్చిన న్యాయమూర్తులు
తెలుగువారు న్యూనతాభావాన్ని వీడాలి: మహాసభల గౌరవాధ్యక్షుడు, అవనిగడ్డ ఎమ్మెల్యే మండలి బుద్ధప్రసాద్‌ ముగింపు సభల్లో మాట్లాడుతూ మరుగున పడుతున్న తెలుగు వారి కళలను బతికించాలంటే సాంస్కృతిక విశ్వవిద్యాలయం ఏర్పాటు చేయాల్సిన అవసరం ఉందని ప్రభుత్వం దృష్టికి తీసుకెళ్లారు. ప్రతి జిల్లాలో సంగీత కళాశాల నెలకొల్పాలని కోరారు. 2014-19 కాలంలో సీఎంగా ఉన్నప్పుడు చంద్రబాబు తెలుగు భాషా వికాసానికి ఎంతో కృషి చేశారని గుర్తుచేశారు.
ఒకప్పుడు తమిళనాడు కేంద్రంగా జరిగిన సాంస్కృతిక, స్వాతంత్య్రోద్యమాలకు నాయకత్వం వహించింది తెలుగువారేనని కొనియాడారు. నాడు పాలకులుగా ఉన్న తెలుగువారిని, అవగాహన లేని కొందరు ఇటీవల పరిచారకులుగా అవమానించడం తగదన్నారు. స్వాతంత్య్రం వచ్చాక కూడా ఉమ్మడి మద్రాసు రాష్ట్రానికి ఎక్కువ కాలం ముఖ్యమంత్రులుగా ఉన్నది తెలుగువారేనని గుర్తు చేశారు.
మనం న్యూనతాభావాన్ని వీడాలన్నారు. త్వరలో జరగబోయే జనగణనలో ఇతర రాష్ట్రాల్లోని తెలుగువారు తమ మాతృభాష తెలుగు అని సగర్వంగా నమోదు చేయించుకోవాలి. అప్పుడే దేశంలో రెండో అతిపెద్ద భాషగా తెలుగు గుర్తింపు పొందుతుందని సూచించారు. ప్రపంచ తెలుగు రచయితల సంఘం గౌరవ అధ్యక్షుడు ఆచార్య యార్లగడ్డ లక్ష్మీప్రసాద్‌ మాట్లాడుతూ సభలు జరిగిన తీరు అందరిలో స్ఫూర్తి నింపిందని, ఈ స్ఫూర్తిని ఒడిసిపట్టుకుని యువతరానికి అందిస్తేనే ప్రయోజనం ఉంటుందన్నారు. ప్రభుత్వాలే అన్ని పనులూ చేయలేవని, అన్నివర్గాలు కలిసొస్తేనే మంచి ఫలితాలు సాధ్యమని తెలిపారు.
'భాషను బతికించడంలో మీడియా పాత్ర ఎంతో ఉంది - తెలుగు భాష మన అస్తిత్వం'
