అనవసర వివాదాల్లోకి లాగొద్దు - కేటీఆర్‌పై దిల్ రాజు కీలక వ్యాఖ్యలు

తెలంగాణ సీఎంతో సినీ ప్రముఖుల భేటీపై కేటీఆర్ వ్యాఖ్యలు బాధాకరమన్న దిల్​రాజు - చిత్ర పరిశ్రమను వివాదాల్లోకి లాగొద్దన్న ఎఫ్‌డీసీ ఛైర్మ

DIL RAJU COMMENTS ON KTR: కేటీఆర్‌పై ఎఫ్‌డీసీ ఛైర్మన్ దిల్ రాజు కీలక వ్యాఖ్యలు చేశారు. తెలంగాణ సీఎం రేవంత్ రెడ్డితో ఇటీవల జరిగిన సినీ ప్రముఖుల భేటీపై కేటీఆర్ వ్యాఖ్యలు బాధాకరమని దిల్‌రాజు అన్నారు. చిత్ర పరిశ్రమను వివాదాల్లోకి లాగొద్దని ఎఫ్‌డీసీ ఛైర్మన్‌ దిల్‌ రాజు కోరారు.

తెలుగు చిత్ర పరిశ్రమను అనవసర వివాదాల్లోకి లాగొద్దని, రాజకీయాలను ఆపాదించొద్దని అన్నారు. రాజకీయ దాడి, ప్రతిదాడులకు పరిశ్రమను వాడుకోవద్దన్న దిల్ రాజు, తెలంగాణ సీఎం రేవంత్ రెడ్డితో సినీ పరిశ్రమ భేటీ చాటుమాటు వ్యవహారం కాదని పేర్కొన్నారు. చిత్ర పరిశ్రమ బాగోగులపై స్నేహపూర్వక చర్చ జరిగిందని వెల్లడించారు. తెలంగాణ సీఎంతో భేటీపై చిత్ర పరిశ్రమ సంతృప్తిగా ఉందని దిల్​ రాజు తెలిపారు.

KTR Comments on Allu Arjun: కాగా హీరో అల్లు అర్జున్ వ్యవహారంపై తెలంగాణ మాజీమంత్రి, బీఆర్​ఎస్ కార్యనిర్వాహక అధ్యక్షుడు కేటీఆర్ మరోసారి స్పందించిన విషయం తెలిసిందే. ​కేవలం ప్రచారం కోసమే సినిమా వాళ్ల గురించి సీఎం రేవంత్​రెడ్డి మాట్లాడారని కేటీఆర్ ఆరోపించారు. ప్రజా సమస్యల నుంచి దృష్టి మళ్లించేందుకు రేవంత్ రెడ్డి ప్రయత్నించారంటూ ధ్వజమెత్తారు.

అటెన్షన్, డైవర్షన్ కోసమే సీఎం రేవంత్‌రెడ్డి పాకులాడుతున్నారని కేటీఆర్ వ్యాఖ్యానించారు. మంగళవారం ఉదయం మీడియాతో కేటీఆర్ చిట్​చాట్ నిర్వహించారు. ఈ సందర్భంగా అల్లు అర్జున్ వ్యవహారంపై కేటీఆర్ స్పందించారు. సీఎం రేవంత్ రెడ్డి సినిమా వాళ్లతో సెటిల్​మెంట్ చేసుకుని ఇప్పుడు ఏం మాట్లాడట్లేదని ఆరోపించారు.

TOLLYWOOD CELEBRITIES CM REVANTH MEETING: కాగా డిసెంబర్​ 26వ తేదీన హైదరాబాద్​లోని బంజారాహిల్స్‌ పోలీస్‌ కమాండ్‌ కంట్రోల్‌ సెంటర్‌లో ఎఫ్​డీసీ ఛైర్మన్‌ దిల్‌రాజు ఆధ్వర్యంలో సినీ ప్రముఖులతో తెలంగాణ సీఎం రేవంత్ రెడ్డి భేటీ అయ్యారు. సంధ్య థియేటర్‌ వద్ద తొక్కిసలాట ఘటన, అల్లు అర్జున్‌ అరెస్టు పరిణామాల నేపథ్యంలో ఈ భేటీకి ప్రాధాన్యత నెలకొన్నప్పటికీ ఈ సమావేశం వేగంగానే ముగిసింది. ఈ సందర్భంగా ఇకపై బెనిఫిట్‌ షోలు ఉండవని రేవంత్‌రెడ్డి మరోసారి స్పష్టం చేశారు.

దీనిపై దిల్​ రాజు సమావేశం అనంతరం మీడియాతో మాట్లాడారు. తెలుగు ఫిల్మ్​ ఇండస్ట్రీ అభివృద్ధే ముఖ్య ఉద్దేశంగా సమావేశం జరిగిందని అన్నారు. తెలుగు సినిమా స్థాయిని పెంచేందుకు సీఎం రేవంత్ రెడ్డి తమకు కొన్ని విషయాల్లో దిశా నిర్దేశం చేశారంటూ దిల్​ రాజు చెప్పుకొచ్చారు. ఫిల్మ్​ ఇండస్ట్రీ, రాష్ట్ర ప్రభుత్వం మధ్య దూరం ఏర్పడిందనే ప్రచారం కేవలం అపోహ మాత్రమేనని కొట్టిపారేశారు. తాజాగా ఈ సమావేశంపై కేటీఆర్ ఆరోపణలు చేయగా, దిల్​ రాజు స్పందించారు.