క్రీడారంగానికి పూర్వ వైభవం తీసుకువస్తాము: డిప్యూటీ సీఎం పవన్ కల్యాణ్ - Sportspersons met Pawan Kalyan

Sportspersons met Deputy CM Pawan Kalyan: దారి తప్పిన క్రీడారంగ వ్యవస్థను ప్రక్షాళన చేయ్యాలని డిప్యూటీ సీఎం పవన్‌ను క్రీడాకారులు కోరారు. కొంతమంది క్రీడాకారులు పవన్‌ను కలసి ఈ మేరకు విన్నవించారు. రాజకీయ ప్రయోజనాల కోసం కాకుండా క్రీడా రంగంలో అనుభవం ఉన్నవారికే ఉన్నత పదవి బాధ్యతలు అప్పగించాలని కోరారు. సానుకూలంగా స్పందించి పవన్‌ క్రీడారంగానికి పూర్వ వైభవం తీసుకువస్తామని భరోసా ఇచ్చారు.

Sportspersons met Deputy CM Pawan Kalyan: వైఎస్సార్​సీపీ ప్రభుత్వంలో రాష్ట్రంలోని అన్ని రంగాలూ అధోగతి పాలయ్యాయని డిప్యూటీ సీఎం పవన్ కల్యాణ్ ధ్వజమెత్తారు. క్రీడారంగం సైతం అస్తవ్యస్తంగా మారిందని మండిపడ్డారు. రాష్ట్రంలో దారి తప్పిన వ్యవస్థలను దారిలో పెట్టడానికి సీఎం చంద్రబాబు, డిప్యూటీ సీఎం పవన్ కల్యాణ్ ధృడ సంకల్పంతో వడివడిగా అడుగులు వేస్తున్నాయని క్రీడాకారులు ఆశాభావం వ్యక్తం చేశారు. మేధావులు, ప్రముఖులు, వాణిజ్యవేత్తలు, క్రీడాకారులు పవన్ కల్యాణ్​ని కలిశారు. ఆంధ్ర , తెలంగాణ, పంజాబ్, దిల్లీకి చెందిన క్రీడాకారులు ఈ మధ్య కాలంలో పవన్​ను కలిశారు.

ఇలా కలసినవారిలో ప్రముఖ క్రికెటర్ హనుమ విహారి కూడా ఉన్నారని క్రీడాసంఘాలు తెలిపాయి. క్రీడా సంఘాలు బాగుపడితేనే అత్యుత్తమ క్రీడాకారులు రూపొందుతారని దానికి సరైన మార్గదర్శనం చేసేవారు అవసరమని వారు పవన్ కల్యాణ్​కి విన్నవించారు. క్రీడలతో సంబంధంలేని వారికి క్రీడా సంఘాలను అప్పగించవద్దని విన్నవించారు. క్రికెట్​లో అనుభవం ఉన్నవారికే క్రికెట్ సంఘం భాద్యతలు అప్పగించాలని, అలాగే కబడ్డీ ఆటపై పట్టు ఉన్నవారికే కబడ్డీ సంఘాన్ని అప్పగించాలని, ఇదే పద్దతి అన్ని సంఘాలలో అమలు చేస్తే క్రీడా రంగంలో రాష్ట్రం అగ్రగామిగా నిలుస్తుందని సూచించారు. కొన్ని క్రీడా సంఘాలు రాజకీయ ఉపాధి ఆవాస కేంద్రాలుగా మారిపోవడం వల్ల క్రీడాకారులకు ఇచ్చే సర్టిఫికేట్లు అంగడి సరుకుగా మారిపోయాయని పవన్ తెలిపారు.