అకాల వర్షం - తడిచిన మొక్కజొన్న, ధాన్యం - నష్టపోయామంటున్న అన్నదాతలు - Crop Got Wet to Rains in AP

Rains in Andhra Pradesh: రాష్ట్రంలో పలుచోట్ల వర్షం కురవడంతో ప్రజలకు కాస్త ఊరట కలిగించిందనే చెప్పాలి. అదే సమయంలో వర్షానికి మొక్కజొన్న, ధాన్యం పంట తడిచిపోవడంతో పలుచోట్ల అన్నదాతలు నష్టపోయారు. మరో రెండు రోజుల్లో వర్షాలు కురిసే అవకాశం ఉండటంతో రైతులు ఆందోళన చెందుతున్నారు.

Rains in Andhra Pradesh: రాష్ట్రంలోని పలు ప్రాంతాల్లో గత కొద్ది రోజులుగా వర్షం కురవడంతో ఎండ తీవ్రతతో అల్లాడుతున్న ప్రజలకు కాస్త ఊరట లభించింది. అదే సమయంలో వర్షానికి చేతికి వచ్చిన పంట తడిచిపోవడంతో పలుచోట్ల అన్నదాతలు తీవ్రంగా నష్టపోయారు. కృష్ణా జిల్లా మోపిదేవి మండలం కోసూరువారిపాలెంలో మూడు రోజులుగా కురిసిన అకాల వర్షానికి రైతులు తీవ్రంగా నష్టపోయారు. పొలంలో ఉన్న మొక్కజొన్న కండెలు వర్షానికి తడిచి మొలకలు వచ్చాయి.

కృష్ణా జిల్లా చల్లపల్లి మండలంలోని నడకుదురు, నిమ్మగడ్డ, ఘంటసాల మండలంలోని పాపవినాశనం, శ్రీకాకుళం గ్రామాల్లో సుమారు 200 ఎకరాల్లో మొక్కజొన్న పంట వర్షానికి తడిచి మొలకలు వచ్చింది. కోసూరువారిపాలెంలో కల్లాల్లోని వరి కుప్పలలోకి వర్షపు నీరుచేరి ధాన్యం మొలకెత్తింది. మరో రెండు రోజుల్లో వర్షాలు కురిసే అవకాశం ఉండటంతో రైతులు ఆందోళన చెందుతున్నారు. దివిసీమలో ఇంకా సుమారు రెండు వేల ఎకరాల్లో వరి కుప్పలు నూర్పిడి చేయాల్సి ఉంది. వర్షాలు కురిస్తే వరి కుప్పల్లోకి నీరు చేరి నష్టం జరిగే ప్రమాదం ఉందని రైతులు ఆవేదన వ్యక్తం చేస్తున్నారు.

కడప జిల్లాలో ఓ మోస్తారుగా వర్షం కురిసింది. ఉక్కపొతతో అల్లాడుతున్న ప్రజలు ఈ వర్షంతో ఊరట చెందారు. తాగునీటి సమస్య తీరుతుందని ప్రజలు ఆశాభావం వ్యక్తం చేశారు. గుంటూరు నుంచి కాకినాడకు బయల్దేరిన సూపర్ లగ్జరీ బస్సు పైభాగం నుంచి వర్షం నీరు లోపలికి వచ్చింది. దీంతో ప్రయాణికులతో పాటు డ్రైవర్ ఇబ్బందులు పడ్డారు. పలువురు ప్రయాణికులు వర్షం నీటితో తడిచిపోవడంతో డ్రైవర్​తో వాగ్వాదానికి దిగారు. తాము డబ్బులు చెల్లించి ప్రయాణం చేస్తుంటే కాలం చెల్లిన పాడైపోయిన బస్సులను నడపటం ఏంటని ప్రశ్నించారు. వర్షాకాలంలో ఇలాంటి బస్సులు నడిపితే ప్రమాదాలు జరిగే అవకాశం ఉందని యాజమాన్యం స్పందించి తగు చర్యలు తీసుకోవాలని బస్సు డ్రైవర్ కోరారు.