'మన కోసం బతికేవాళ్లు ఉన్నారు - అవి అవసరమా డార్లింగ్స్' - ప్రభాస్ న్యూఇయర్ మేసేజ్

లైఫ్‌లో మనకు బోలెడన్ని ఆనందాలు ఉన్నాయన్న ప్రభాస్ - మనల్ని ప్రేమించే, మనకోసం బతికేవాళ్లు మనకున్నారంటూ వీడియో విడుదల

Prabhas Drugs Awareness Video: కొత్త సంవత్సరం వేళ డ్రగ్స్‌పై అవగాహన కల్పిస్తూ రెబల్ స్టార్ ప్రభాస్ స్పెషల్ వీడియో విడుదల చేశారు. మనల్ని ప్రేమించే మనుషులు, మనకోసం బతికే మనవాళ్లు ఉన్నాక డ్రగ్స్ అవసరమా డార్లింగ్స్ అంటూ ప్రభాస్ చెప్పుకొచ్చారు. జీవితంలో మనకు బోలెడన్నీ ఎంజాయ్​మెంట్స్ ఉన్నాయని, కావల్సినంత ఎంటర్‌టైన్‌మెంట్ ఉందని, ఇక డ్రగ్స్‌కు నో చెప్పాలని (SAY NO TO DRUGS) పిలుపునిచ్చారు.

కాగా తెలంగాణ రాష్ట్ర ప్రభుత్వం సూచన మేరకు స్పందించిన ప్రభాస్ తన వంతు సామాజిక బాధ్యతగా యువత మత్తు పదార్థాలకు బానిసలుగా మారకుండా ఉండేందుకు అవగాహన కోసం స్పెషల్ వీడియో విడుదల చేశారు. మనకి తెలిసిన వాళ్లు ఎవరైనా డ్రగ్స్‌కు బానిసలైతే వెంటనే 87126 -71111 నెంబర్​కు ఫోన్ చేయాలని ప్రభాస్ సూచించారు. డ్రగ్స్​కు బానిసలైన వాళ్లు పూర్తిగా కోలుకునే విధంగా తెలంగాణ రాష్ట్ర ప్రభుత్వం చర్యలు తీసుకుంటోందని తెలిపారు.

Tollywood Celebrities Awareness on Drugs: డ్రగ్స్ రహిత సమాజమే లక్ష్యంగా కృషి చేస్తున్న తెలంగాణ ప్రభుత్వానికి యువత సహకరించాలంటూ ఇప్పటికే పలువురు సినీ ప్రముకులు పిలుపునిచ్చిన విషయం తెలిసిందే. మెగాస్టార్ చిరంజీవి, జూనియర్​ ఎన్టీఆర్, విజయ్​ దేవరకొండ, సీనియర్​ నటుడు మోహన్​ బాబు సైతం డ్రసే నో టూ డ్రగ్స్ అంటూ వీడియో సందేశాలను విడుదల చేశారు. ఎంతో మంది యువత డ్రగ్స్​కు బానిసలు అయి తమ భవిష్యత్తును నాశనం చేసుకుంటుున్నారని సినీ ప్రముఖులు ఆవేదన వ్యక్తం చేశారు. డ్రగ్స్ రహిత తెలంగాణపై యాంటీ నార్కోటిక్‌ టీమ్​కు సహకరిస్తూ తనవంతు బాధ్యతగా స్పెషల్ వీడియో సందేశాలను రూపొందించారు.

సినీ పరిశ్రమకు తెలంగాణ సీఎం రేవంత్​ విజ్ఞప్తి : ఇప్పటికే తెలంగాణ సీఎం రేవంత్​రెడ్డి డ్రగ్స్​, సైబర్​ క్రైమ్​పై సినీ పరిశ్రమ యువతకు అవగాహన కల్పించాలని కోరిన విషయం తెలిసిందే. సమాజాన్ని కాపాడుకోవాల్సిన బాధ్యత సినీ పరిశ్రమపై ఉందని రేవంత్ రెడ్డి తెలిపారు. సినీ నటులతో డ్రగ్స్​, సైబర్​ నేరాలపై రెండు నిమిషాల అవగాహన వీడియో చిత్రీకరించాలని సూచించారు.