Rape on Girl in Nandhyal District: ముక్కుపచ్చలారని పసికందుపై ముగ్గురు మైనర్లు అత్యాచారానికి ఒడిగట్టారు. ఆడుతూ పాడుతూ స్నేహితులతో కలిసి స్కూల్కు వెళ్లాల్సిన ఆ చిన్నారిపై అఘాయిత్యానికి పాల్పడ్డారు. బాలికపై అత్యాచారానికి పాల్పడ్డ ఆ మృగాలు ఈ విషయం అందరికీ తెలిసిపోతుందని ఆ పసిపాపను సమీపంలోని కాల్వలో పడేశారు. ఈ అమానవీయ ఘటన నంద్యాల జిల్లాలో చోటు చేసుకుంది.
పోలీసులు తెలిపిన వివరాల ప్రకారం: పగిడ్యాల మండలానికి చెందిన ఓ బాలిక మూడు రోజుల క్రితం అదృశ్యమైంది. ఆమె తండ్రి సమీప పోలీస్ స్టేషన్కు వెళ్లి ఫిర్యాదు చేశారు. దీంతో విచారణ చేపట్టిన పోలీసులు బాలిక కోసం గాలింపు చర్యలు చేపట్టారు. ఈ క్రమంలో ముగ్గురు మైనర్లను అదుపులోకి తీసుకున్న పోలీసులు తమదైన శైలిలో విచారణ చేపట్టగా అసలు నిజం బయటకొచ్చింది.
పార్క్ వద్ద ఆడుకుంటున్న బాలికను సమీపంలోని ఎత్తిపోతల పథకం వద్దకు తీసుకెళ్లామని, అనంతరం అత్యాచారం చేసినట్లు నిందితులు అంగీకరించారు. ఈ విషయం బయటపడుతుందనే భయంతో బాలికను కాల్వలోకి తోసేశామని తెలిపారు. ప్రస్తుతం పోలీసులు బాలిక ఆచూకీ కోసం గాలింపు చర్యలు చేపట్టారు.
