పదవులంటే బాధ్యతలు- వాటితో మంచి చేయండి! నామినేటెడ్ నేతలకు సీఎం శుభాకాంక్షలు

నామినేటెడ్ పదవులు పొందిన వారికి సీఎం చంద్రబాబు శుభాకాంక్షలు - పార్టీకి, ప్రభుత్వానికి మంచి పేరు తీసుకురావాలని సూచన

CM Chandrababu Nominated Posts: నామినేటెడ్ పదవులు పొందిన వారికి ముఖ్యమంత్రి చంద్రబాబు శుభాకాంక్షలు తెలిపారు. పదవులను బాధ్యతగా భావించి ప్రజల కోసం నాయకులు పనిచేయాలని స్పష్టంచేశారు. పోరాటం, కష్టం, త్యాగం, పనితీరు, విధేయత, క్రమశిక్షణ ఆధారంగా పదవులు ఇచ్చామని గుర్తుచేశారు. 30 వేల దరఖాస్తులు పరిశీలించి, తగిన వ్యక్తికి తగిన గౌరవం విధానంతో అవకాశం కల్పించామన్నారు. వేధింపులకు గురైన వారికి, మహిళలు, యువతకు అవకాశాలు, సమర్థత చాటిన బూత్ స్థాయి కార్యకర్తలకు రాష్ట్ర స్థాయి పదవులు దక్కాయని తెలిపారు. పొలిటికల్ గవర్నెన్స్​లో భాగంగా ఎంపికైన వారు పార్టీకి, ప్రభుత్వానికి మంచి పేరు తీసుకురావాలని పిలుపునిచ్చారు. నామినేటెడ్ పదవులు పొందిన వారికి ముఖ్యమంత్రి చంద్రబాబు పలు సూచనలు చేశారు.

30 వేల దరఖాస్తులను స్వయంగా పరిశీలించి: నామినేటెడ్ పదవుల మొదటి లిస్టులో 20 ఛైర్మన్ పోస్టులు, ఒక వైస్ ఛైర్మన్ పోస్టులను ప్రభుత్వం భర్తీ చేసింది. రెండో లిస్టులో ఏకంగా 62 మందికి ఛైర్మన్ పదవులు, సలహాదారు పదవులు కట్టబెట్టింది. సుదీర్ఘ కసరత్తు తరువాత పదవుల కోసం వచ్చిన 30 వేల దరఖాస్తులను స్వయంగా పరిశీలించిన ముఖ్యమంత్రి నేతలను వివిధ పోస్టులకు ఎంపిక చేశారు. వీటిలో 60 రాష్ట్ర స్థాయి కార్పొరేషన్ పదవులు కాగా, క్యాబినెట్ హోదాతో రెండు సలహాదారు పోస్టులు ఉన్నాయి.

పదవులు పొందిన అందరికీ ముఖ్యమంత్రి శుభాకాంక్షలు తెలిపి అభినందించారు. కూటమి ప్రభుత్వంలో మంచి అవకాశాలు పొందారన్న చంద్రబాబు, పొలిటికల్ గవర్నెన్స్​ను దృష్టిలో పెట్టుకుని నామినేటెడ్ పదవులకు ఎంపిక చేశామని స్పష్టంచేశారు. పొలిటికల్ గవర్నెన్స్ అంటే ప్రజలకు చేసే మంచిలో భాగస్వాములు కావడమేనని తేల్చిచెప్పారు. మరింత ఖచ్చితత్వంతో, క్షేత్ర స్థాయి పరిస్థితులకు అనుగుణంగా ప్రజలకు సేవ చేసే అవకాశం ఏర్పడుతుందన్నారు. పదవులను బాధ్యతగా భావించి ప్రజల కోసం పనిచేయాలని సూచించారు.

'చాగంటి'కి కీలక పదవి - ఏపీలో నామినేటెడ్ పోస్టుల రెండో జాబితా విడుదల

కష్టపడిన వారికి న్యాయం చేయాలనే : పదవుల ఎంపికపై సుదీర్ఘమైన, పటిష్టమైన కసరత్తు చేశామని సీఎం చంద్రబాబు స్పష్టంచేశారు. ఎంతో మంది ఆశావాహులు ఉన్నా కష్టపడిన వారికి న్యాయం చేయాలనే అంశం ప్రాతిపదికగా ముందుగా మిమ్మల్ని ఎంపిక చేశామన్నారు. పార్టీ కోసం పోరాటం, కష్టం, త్యాగం, పనితీరు, విధేయత, క్రమశిక్షణ ఆధారంగా ఈ ఎంపికలు జరిగాయన్నారు. సార్వత్రిక ఎన్నికల్లో సరైన వ్యక్తికి సరైన చోట టిక్కెట్ అనే విషయంలో అనుసరించిన విధానం మంచి ఫలితాన్ని ఇచ్చిందన్న చంద్రబాబు, స్వయంగా ప్రజల నుంచి ఎమ్మెల్యేగా ఎవరిని కోరకుంటున్నారని ఐవీఆర్ఎస్ ద్వారా తెలుసుకుని ప్రజామోదం ఉన్నవారికే టిక్కెట్లు ఇచ్చిన్నట్లు గుర్తుచేశారు.

పార్టీ కోసం పనిచేసిన వారికి పదవులు: ప్రజలు ఆ విధానాన్ని స్వాగతించడం వలనే చరిత్రలో లేని విధంగా 93 శాతం స్ట్రైక్ రేట్​తో, 57 శాతం ఓట్ షేర్​తో కూటమికి పట్టంకట్టారని తేల్చిచెప్పారు. నేడు పదవుల విషయంలో కూడా అదే సూత్రాన్ని అవలంభించిన్నట్లు తెలిపారు. ముఖ్యంగా తీవ్ర ప్రతికూల పరిస్థితుల్లో పార్టీ కోసం పనిచేసిన వారికి పదవులు ఇచ్చామన్నారు. గత ప్రభుత్వ దాష్టీకాలను ఎదుర్కొని 5 ఏళ్లు ధైర్యంగా నిలబడిన వారికి ఎక్కువ ప్రాధాన్యం కల్పించారు. కేసులు, దాడులు, వేధింపులకు గురైన వారిని గుర్తుపెట్టుకుని గౌరవించిన్నట్లు వెల్లడించారు.

ఎన్ని సవాళ్లు వచ్చినా నిలబడి పోరాటం చేసిన వారికి, మహిళలు, యువతకు నామినేటెడ్ పదవుల్లో అవకాశాలు కల్పించాం. బూత్ స్థాయి కార్యకర్తలకు రాష్ట్ర స్థాయి పదవులు ఇచ్చే ఏకైక పార్టీగా తెలుగుదేశం నిలుస్తుందన్నారు. చాలా మంది బూత్ ఇంఛార్జ్‌లు, క్లస్టర్ ఇంఛార్జ్‌లు, యూనిట్ ఇంఛార్జ్‌లు, గ్రామ అధ్యక్షులు, వార్డు అధ్యక్షులకు రాష్ట్ర స్థాయి పదవులు ఇచ్చామని తెలిపారు. రానున్న రోజుల్లోనూ మరిన్ని పదవులు ఇస్తామని, గత 5 ఏళ్లు పార్టీ కార్యక్రమాల నిర్వహణలో, మెంబర్ షిప్ కార్యక్రమంలో, పార్టీ నిర్దేశించిన ఇతర లక్ష్యాలను చేరుకున్న వారికి నామినేటెడ్ పదవులు ఇచ్చిన్నట్లు గుర్తుచేశారు.

మారుమూల గ్రామంలో ఉన్నవారికీ పదవి లభిస్తుంది: పార్టీ కోసం కష్టపడి పనిచేస్తే ఎక్కడో మారుమూల గ్రామంలో ఉన్నవారికీ పదవి లభిస్తుందనేది నేటి ఈ పోస్టుల ద్వారా మరోసారి అందరికీ అర్ధం అయ్యిందన్నారు. పనిచేసిన వారికి న్యాయం చేసే క్రమంలో జరిగిన తొలి ఎంపికల్లో అవకాశం పొందారని, రానున్న రోజుల్లో ఇతరులకు కూడా తగిన విధంగా అవకాశాలు కల్పించి, గౌరవిస్తామన్నారు. ఇంకా చాలా మందికి ఆయా కార్పొరేషన్​ల డైరెక్టర్లుగా, ఇతర పదవులు ఇస్తామని ముఖ్యమంత్రి వెల్లడించారు. పదవులు వచ్చిన నాయకులు, యువత రెండేళ్ల పదవీ కాలాన్ని సమర్థవంతంగా ఉపయోగించుకుని ప్రజల కోసం నిజాయితీగా, కష్టపడి పనిచేయడం ద్వారా రానున్న రోజుల్లో రాజకీయంగా మరింత ఎదగడానికి ఆస్కారం ఏర్పడుతుందన్నారు.

ప్రజలతో మమేకమై పనిచేయాలి: సింపుల్ గవర్నమెంట్ ఎఫెక్టివ్ గవర్నెన్స్ అనే నినాదాన్ని గుర్తుపెట్టుకుని ప్రజలతో మమేకమై పనిచేయాలని పదవులు పొందిన వారికి సీఎం సూచించారు. పదవులు వచ్చిన వారు ప్రజలతో మరింత సౌమ్యంగా, గౌరవంగా ఉండాలని, ఎక్కడా పదవీ అహంకారం, హడావుడి అనేది కనిపించకూడదన్నారు. అప్పుడే ప్రభుత్వంతో పాటు తమకు మంచి పేరు వస్తుందని ముఖ్యమంత్రి చంద్రబాబు సూచించారు.