Chandrababu Help For US Youth Exchange Selected Girl: ప్రతిభకు పేదరికమనేది అడ్డుకాదని ఓ విద్యార్థి నిరూపించారు. చిన్ననాటి నుంచి చదువులో మెరిట్ సాధించిన తనను విదేశీ విద్య వరించింది. అమెరికాలో నిర్వహించే కెనడీ లూగర్‌ యూత్ ఎక్స్‌ఛేంజ్‌ కార్యక్రమంలో పాల్గొనేందుకు సూర్య తేజశ్రీ అర్హత సాధించారు. విషయం తెలుసుకున్న ముఖ్యమంత్రి చంద్రబాబు రాష్ట్రం నుంచి ఎంపికైన ఇద్దరిని తమ కార్యాలయానికి పిలిచి అభినందించారు. పేద విద్యార్థుల అభ్యున్నతికి కూటమి ప్రభుత్వం ఎప్పుడూ తోడ్పాటును ఇస్తుందని భరోసా ఇచ్చారు.
పత్రిభకు పేదరికం అడ్డుకాదని నిరూపించిన అమ్మాయి: అమెరికాలో నిర్వహించనున్న యూత్ ఎక్స్‌ఛేంజ్‌ ప్రోగ్రామ్‌కు ఏలూరు జిల్లా జంగారెడ్డి గూడెంకు చెందిన బందెల సూర్యతేజశ్రీ ఎంపికయ్యారు. అంబేడ్కర్ గురుకుల ఐఐటీ, మెడికల్ అకాడమీలో సూర్యతేజశ్రీ ఇంటర్మీడియట్ ప్రథమ సంవత్సరం చదువుతున్నారు. ఈ కార్యక్రమానికి భారత దేశం నంచి 30 మంది విద్యార్థులు ఎంపిక కాగా అందులో మన రాష్ట్రం నుంచి ఇద్దరు అర్హత పొందారు. వారిలో సూర్యతేజశ్రీ ఒకరు. మధ్య తరగతి కుటుంబంలో జన్మించిన సూర్యతేజశ్రీ చిన్నప్పటి నుంచి చదువులో ఉన్నతంగా ఉండేవారు. ఉపాధ్యాయులు, గురువుల సహకారంతో ఇప్పుడు మరో మెట్టు ఎక్కారు.
వేలాది మందితో పోటీ పడి కెనడీ లూగర్‌ యూత్ ఎక్స్‌ఛేంచ్‌ కార్యక్రమంలో పాల్గొంటున్నారు. ఈ కార్యక్రమంలో భాగంగా ఒక సంవత్సరంపాటు సూర్యతేజశ్రీ అమెరికాలోనే ఉండనున్నారు. మన దేశ సంస్కృతి, సాంప్రదాయాలను యూత్ ఎక్స్‌ఛేంజ్‌ ప్రోగ్రామ్‌లో తెలియజేయనున్నారు. పేద కుటుంబంలో పుట్టిన తమ కుమార్తెకు ఆర్థిక సాయం అందించాలంటూ సూర్యతేజశ్రీ తల్లి నాగమణి ప్రజా దర్బార్‌లో లోకేశ్కు వినతిపత్రం అందించారు. విషయం తెలుసుకున్న మంత్రి లోకేశ్ యూత్ ఎక్స్‌ఛేంజ్‌ ప్రోగ్రామ్‌కు ఎంపికైన ఇద్దరిని సచివాలయానికి పిలిపించి అభినందించారు.
అమెరికాలో ఏడాది పాటు అందించే కోర్సుల్లో నచ్చినది అభ్యసించే అవకాశం ఉంటుంది. మాది పేద కుటుంబం. ముఖ్యమంత్రి చంద్రబాబు మాకు సహాయం చేశారు. మమ్మల్ని తన కార్యాలయానికి పిలిచి అభినందించారు. రాష్ట్రానికి ఎంతో గర్వకారణమన్నారు. ఆయనే స్వయంగా రూ.లక్ష చెక్కు, ల్యాప్‌టాప్‌ అందించారు. ఈ సహాయం మరువలేనిది. రాష్ట్ర సంస్కృతి, సాంప్రదాయాలను అక్కడ చాటి చెబుతాం. చంద్రబాబు, లోకేశ్లను స్పూర్తిగా తీసుకొని లక్ష్యసాధన కోసం ముందుకు సాగుతాం. మరింత ప్రోత్సాహం అందిస్తామని సీఎం భరోసా ఇచ్చారు- సూర్యతేజశ్రీ, విద్యార్థిని.
నా కుమార్తె చదువు విషయం ప్రజా దర్బార్‌లో మంత్రి లోకేశ్కు విన్నవించాను. దీంతో ఆయన వెంటనే స్పందించారు. తన విదేశీ విద్యకు సాయం చేస్తామన్నారు. నా కుమార్తెను సీఎం చంద్రబాబు ప్రశంసించారు. చదువుకున్న ప్రతి ఒక్కరు పేదరికంలోనే జీవించకూడదని లోకేశ్ సాయం అందించారు. ఇంతటి సాయం చేసిన చంద్రబాబు, లోకేశ్కు ప్రత్యేక ధన్యవాదాలు. - విద్యార్థిని కుటుంబసభ్యులు.
సీఎం చంద్రబాబు, లోకేశ్ ఆర్థిక సాయం: ప్రోత్సాహకంగా ముఖ్యమంత్రి చంద్రబాబు చేతుల మీదుగా లక్ష రూపాయల ఆర్థిక సాయం, ల్యాప్ ట్యాప్ అందించారు. యూత్ ఎక్స్‌ఛేంజ్‌ కార్యక్రమం ద్వారా భారతదేశ సంస్కృతి, సాంప్రదాయాల ఔన్నత్యాన్ని ప్రపంచానికి తెలియజేయాలని ఆ బాలికలతో చంద్రబాబు అన్నారు. ప్రతిభావంతులైన విద్యార్థులు ఎక్కుడున్నా తమ ప్రభుత్వం ప్రోత్సహిస్తుందని చెప్పారు. చంద్రబాబు, లోకేశ్ స్ఫూర్తితో లక్ష్య సాధన కోసం తాము ముందుకు సాగుతామని సూర్యతేజశ్రీ అన్నారు.
