రాష్ట్రాన్ని అత్యంత పరిశుభ్రంగా తీర్చిదిద్దడమే లక్ష్యం - 18న 'స్వచ్ఛ దివస్'

ప్రతి మూడో శనివారం ఏపీలో స్వచ్ఛ దివస్ కార్యక్రమం - 18న కడప జిల్లా మైదుకూరులో ప్రారంభించనున్న సీఎం చంద్రబాబు

AP CS Vijayanand On Swachh Andhra – Swachh Divas Programme: 'స్వచ్ఛ ఆంధ్ర – స్వచ్ఛ దివస్' కార్యక్రమానికి కార్యాచరణను చేపట్టాలని సీఎస్ కె. విజయానంద్ ఆదేశాలు ఇచ్చారు. దేశంలోనే అత్యంత పరిశుభ్రత కలిగిన రాష్ట్రంగా ఆంధ్రప్రదేశ్​ను తీర్చిదిద్దాలనే లక్ష్యంతో పని చేయాలని ఆయన సూచనలు జారీ చేశారు. దీనిని ప్రతి మూడో శనివారం నిర్వహించాలని అధికారులకు దిశానిర్దేశం చేశారు. ప్రతి నెలకో థీమ్​తో 12 మాసాలకు 12 అంశాలతో కూడిన కార్యక్రమ నిర్వహణకు చర్యలు చేపట్టాలని నిర్ణయించారు. ఈ సందర్భంగా రాష్ట్ర స్వచ్ఛత కార్యక్రమాన్ని జనవరి 18న కడప జిల్లా మైదుకూరులో సీఎం చంద్రబాబు ప్రారంభిస్తారని సీఎస్ విజయానంద్ వెల్లడించారు.

సీఎం చంద్రబాబు చేతుల మీదుగా ప్రారంభం: దేశంలోనే అత్యంత పరిశుభ్రత కలిగిన రాష్ట్రంగా ఆంధ్రప్రదేశ్​ను తీర్చిదిద్దాలనే లక్ష్యంతో నెలలో ప్రతి శనివారం స్వచ్ఛత కోసం అంకితం కావాలని సీఎస్ విజయానంద్ అన్నారు. సీఎం చంద్రబాబు పిలుపు మేరకు ఇకపై ప్రతి మూడో శనివారం స్వచ్ఛ ఆంధ్ర – స్వచ్ఛ దివస్ కార్యక్రమాన్ని భారీ స్థాయిలో నిర్వహించేందుకు చర్యలు చేపట్టాలని సీఎస్ సూచించారు. ఈ నెల 18వ తేదీన కడప జిల్లా మైదుకూరులో రాష్ట్ర ముఖ్యమంత్రి చంద్రబాబు నాయుడు ప్రారంభించనున్న ఈ కార్యక్రమాన్ని రాష్ట్ర వ్యాప్తంగా విజయవంతంగా నిర్వహించేందుకు రాష్ట్ర స్థాయి నుంచి గ్రామ స్థాయి వరకూ భాగస్వామ్యులు కావాలని అందరికీ పిలుపునిచ్చారు.

అన్ని జిల్లాల కలెక్టర్లతో వీడియో కాన్ఫరెన్స్​: సచివాలయం నుంచి అన్ని జిల్లాల కలెక్టర్లతో వీడియో కాన్ఫరెన్స్​ను నిర్వహించిన సీఎస్ విజయానంద్​ ఈ కార్యక్రమాన్ని విజయవంతంగా నిర్వహించేందుకు తగిన సూచనలు, సలహాలను ఇవ్వాల్సిందిగా అధికారులను కోరారు. స్వచ్ఛత కార్యక్రమ నిర్వహణకు సంబంధించిన మార్గదర్శకాలను ఇప్పటికే అన్ని జిల్లాల కలెక్టర్లకు జారీ చేసినట్టు ఆయన తెలిపారు. ఆ మార్గదర్శకాలకు అనుగుణంగా ఈ కార్యక్రమాన్ని క్షేత్ర స్థాయిలో విజయవంతంగా నిర్వహించేందుకు జిల్లా కలెక్టర్లు తగిన శ్రద్ద చూపాలన్నారు.

నెలకో థీమ్​తో వినూత్నంగా స్వచ్ఛ ఆంధ్ర – స్వచ్ఛ దివస్: జనవరి మాసంలో న్యూ ఇయర్ - క్లీన్ స్టార్ ధీమ్​తో, ఫిబ్రవరి మాసంలో సోర్సు-రిసోర్సు థీమ్​తో, మార్చిలో అవాయిడ్ సింగిల్ యూజ్ ప్లాస్టిక్స్ – ప్రమోట్ రీయూజబుల్స్ థీమ్​తో, ఏప్రిల్​లో ఇ-చెక్ థీమ్​తో, మేలో నీరు-మీరు థీమ్​తో, జూన్​లో బీట్ ది హీట్ థీమ్​తో, జులైలో ఎండింగ్ ప్లాస్టిక్ పొల్యూషన్ థీమ్​తో, ఆగస్టులో మాన్ సూన్ హైజనిక్ థీమ్​తో, సెప్టెంబరులో గ్రీన్ ఏపీ థీమ్​తో, అక్టోబరులో క్లీన్ ఎయిర్ థీమ్​తోను, నవంబరులో పర్సనల్ కమ్యునిటీ హైజిన్ థీమ్​తో, డిసెంబర్​లో ఆపర్చునిటీస్ ఇన్ ఎన్విరాన్​మెంట్​ థీమ్​తో ఈ కార్యక్రమాన్ని నిర్వహిస్తున్నట్లు ఆయన తెలిపారు.

పర్యావరణ పరిశుభ్రతపై అవగాహన కల్పించడమే లక్ష్యం: పర్యావరణ పరిరక్షణ అంశంలో కమ్యునిటీ ఎంగేజ్​మెంట్​ను ప్రోత్సహించడం, పరిశుభ్రమైన వాతావరణం ద్వారా ప్రజారోగ్య పరిరక్షణ, పర్యావరణంపై కాలుష్య ప్రభావాన్ని తగ్గించడం, పర్యాటకులు, యాత్రికులను, పెట్టుబడిదారులను ఆహ్వానించే విధంగా ఆహ్లాదకరమైన వాతావరణాన్ని కల్పించడం, ఆర్థిక ప్రయోజనాలను మెరుగుపర్చడం పిల్లలు, భవిష్యత్ తరాల వారికి పర్యావరణ పరిశుభ్రతపై అవగాహన కల్పించడం అనే లక్ష్యాలతో ఈ కార్యక్రమాన్ని నిర్వహిస్తున్నట్లు తెలిపారు. మార్గదర్శకాలకు అనుగుణంగా ఈ కార్యక్రమాన్ని విజయవంతంగా నిర్వహించేందుకు ఈ కార్యక్రమంలో ప్రజాప్రతినిధులను, అన్ని వర్గాల ప్రజలను పెద్ద ఎత్తున భాగస్వామ్యులను చేయాలని సీఎస్ విజయానంద్ సూచించారు.