ఓట్ల కోసం జగనన్న హామీలిస్తాడు - అమలు మాత్రం చేయడు: వైఎస్ షర్మిల

YS Sharmila Fire on PM Modi: కేంద్రంలో కాంగ్రెస్‌ పార్టీ అధికారంలోకి వచ్చిన వెంటనే రాష్ట్రానికి పది సంవత్సరాల పాటు ప్రత్యేక హోదా వస్తుందని, రాహుల్‌ గాంధీ తొలి సంతకం దీనిపైనే చేస్తారని పీసీసీ అధ్యక్షురాలు వైఎస్ షర్మిల ప్రకటించారు. తిరుపతి ఎస్వీ మైదానంలో ఏర్పాటు చేసిన బహిరంగ సభలో ఆమె ఈ వ్యాఖ్యలు చేశారు. హోదాపై జగన్ మడమతిప్పారని అన్నారు. వచ్చే ఎన్నికల్లో హోదా కోసం ఆరాట పడే వాళ్ళ మధ్య, హోదాను తాకట్టు పెట్టిన వారికి మధ్య జరుగుతున్న పోరాటమన్నారు.

YS Sharmila Fire on PM Modi : కేంద్రంలో కాంగ్రెస్ అధికారంలోకి రాగానే ప్రత్యేకహోదాపై తొలి సంతకం చేస్తామని పీసీసీ అధ్యక్షురాలు షర్మిలా రెడ్డి అన్నారు. తిరుపతి ఎస్వీయూ తారకరామ మైదానంలో నిర్వహించిన న్యాయసాధన సభలో ఆమె పాల్గొన్నారు. గతంలో ఎన్నికల ప్రచారంలో ఇదే వేదిక పై ప్రత్యేకహోదా ఇస్తానన్న ప్రధాని మోదీ మాట తప్పారని విమర్శించారు. తాము అధికారంలోకి వస్తే 10 ఏళ్లు ప్రత్యేక హోదా అమలు చేస్తామని, ప్రత్యేక హోదా - ఆంధ్రుల హక్కు అని స్పష్టం చేశారు.

తిరుపతిలో ఇదే మైదానంలో ప్రధాని మోదీ 2014 లో ప్రత్యేకహోదా హామీ ఇచ్చారని పీసీసీ అధ్యక్షురాలు షర్మిల గుర్తు చేశారు. ఓట్ల కోసం ప్రత్యేకహోదా వాగ్దానం చేసి, రాష్ట్ర రూపురేఖలు మారుస్తానని హామీ ఇచ్చారన్నారు. రాష్ట్ర ప్రజల హక్కులో ఏ ఒక్కటైనా పది సంవత్సరాలలో సాధించారా అని ప్రశ్నించారు. రాష్ట్రంలో పాలకపక్షం, ప్రతిపక్షం రెండు బీజేపీకి దాసోహమయ్యాయని ఎద్దేవా చేశారు. మూడు నామాల వాడి సాక్షిగా ఇచ్చిన హామీలకు పంగనామాలు పెట్టారని దుయ్యబట్టారు. రాష్ట్రానికి మూడు రాజధానులు కావాలన్న జగన్‍ ఒకటైనా నిర్మించారా అని ప్రశ్నించారు.

జగనన్న మోదీ వ్యాపారి? : ప్రత్యేకహోదా ఇవ్వకుండా పదేళ్లుగా తల్లి ఆంధ్రాను మోదీ చంపుతూనే ఉన్నారన్నారు. ఎన్నికలకు ముందు ప్రత్యేకహోదా సంజీవని అన్న చంద్రబాబు ఏమి చేశారన్నారు. ప్రత్యేక హోదా కోసం మూకుమ్మడి రాజీనామా చేస్తామన్న జగన్ ఏమయ్యాడని, మూకుమ్మడి కాదు కదా ఒక్కరు కూడా రాజీనామా చేయలేదన్నారు. పులి అన్న జగన్ ఏమయ్యాడని ఎద్దేవా చేశారు. మోదీ చెప్పిన ప్రతి వ్యాపారికి జగనన్న అన్ని చేశాడని ఆరోపించారు. ప్రత్యేక హోదా గురించి ఒక ఎంపీ అయినా మాట్లాడారా అని ప్రశ్నించారు. అధికారంలోకి వచ్చిన వెంటనే పది సంవత్సరాల ప్రత్యేక హోదా అమలు చేస్తామని హామీ ఇచ్చారు.