Top Searched Recipes : మనకు ఏదైనా డౌట్ వస్తే వెంటనే స్మార్ట్ఫోన్ లేదా ల్యాప్టాప్ ఓపెన్ చేసి గూగుల్లో సెర్చ్ చేసేస్తుంటాం. ఇలా టైప్ చేయగానే చిటికెలో మనకు సమాధానం సమాచారం మొత్తం వచ్చేస్తుంది. ఇక ఇంటర్నెట్ వినియోగం పెరిగిన తర్వాత వంటలు చేయడం కూడా చాలా ఈజీ అయిపోయింది. ఏదైనా రెసిపీ కోసం సెర్చ్ చేయగానే దాని తయారీకి సంబంధించిన వీడియోలు ఇలా యూట్యూబ్లో ప్రత్యక్షమైపోతాయి. అయితే, ప్రముఖ సెర్చ్ ఇంజిన్ గూగుల్ ఈ ఏడాది భారతీయులు అత్యధికంగా సెర్చ్ చేసిన టాపిక్ లిస్ట్లను రిలీజ్ చేసింది. ఇందులో ఎక్కువ మంది ఏ వంటల గురించి వెతికారో తెలిస్తే మీరు ఆశ్యర్యపోతారు. మరి ఆ రెసిపీలు ఏంటో ఓ లుక్కేయండి..
ఆవకాయ :
'ఆవకాయ' ఈ పదం వింటేనే చాలా మందికి నోరూరుతుంది. వేడివేడి అన్నంలో కాస్త నెయ్యి వేసుకుని ఎర్రెర్రని ఆవకాయ పచ్చడితో తింటే అమృతమే! ప్రతి వేసవిలో తెలుగు వారి ఇళ్లలో సంవత్సరానికి సరిపడా ఆవకాయ పచ్చడి తప్పకుండా పెడుతుంటారు. పచ్చి మామిడికాయ ముక్కల్లో కారం, ఆవపిండి, నువ్వులనూనె, ఉప్పు జోడించి చేసే ఆవకాయ రుచికి తిరుగులేదు. ఎందుకంటే, 2024 సంవత్సరంలో ఎక్కువ మంది సెర్చ్ చేసిన వంటకాల్లో ఆవకాయ ఫస్ట్ ప్లేస్లో నిలిచింది మరి!
ధనియా పంజిరి :
ధనియా పంజిరి అనేది ప్రధానంగా నార్త్ ఇండియాలో, ముఖ్యంగా పంజాబ్, హర్యానా, రాజస్థాన్ వంటి రాష్ట్రాలలో ఎక్కువగా తయారు చేసే ఒక ప్రత్యేకమైన వంటకం. ఈ పంజిరిని జన్మాష్టమి వంటి పండుగల సమయంలో ప్రసాదంగా కూడా పంచిపెడతారు. దీనిని బాదం, జీడిపప్పు, ఎండుకొబ్బరి, ఫూల్‌మఖానా, ధనియాలపొడి, పంచదార, నెయ్యిలతో తయారు చేస్తారు. ధనియా పంజిరి ఎంతో రుచిగా ఉండడమే కాదు.. దీనిని తినడం వల్ల జీర్ణప్రక్రియ మెరుగుపడుతుంది. అలాగే రోగనిరోధక శక్తి కూడా పెరుగుతుంది.
ఉగాది పచ్చడి : తెలుగువారి కొత్త సంవత్సరం ఉగాది రోజున చేసే 'ఉగాది పచ్చడి' కూడా టాప్ సెర్చ్ రెసిపీ లిస్ట్లోకి చేరిపోయింది. తీపి, కారం, పులుపు, ఉప్పు, వగరు, చేదు- ఈ 6 రుచుల (షడ్రుచులు) సమ్మేళనమే ఉగాది పచ్చడి. మన ఉగాది పచ్చడి జీవితంలో ఎదురయ్యే కష్టాలు, సుఖాలన్నింటినీ సమంగా స్వీకరించాలనే సందేశాన్నిస్తుంది.
పంచామృతం: ఆలయాల్లో దేవుడికి పంచామృతం నైవేద్యంగా సమర్పిస్తారు. పాలు, పెరుగు, పంచదార, తేనె, నెయ్యి, పండ్లతో పూజా సమయాల్లో చేసే 'పంచామృతం' మన సంస్కృతికి అద్దం పడుతుంది. నెటిజన్లు పంచామృతం తయారీ గురించి 2024లో ఎక్కువగా వెతికారు.
ఎమా దత్షి: భూటాన్‌లో ఉల్లి, వెల్లుల్లి, క్యాప్సికం, టమాటా, చీజ్, బటర్‌లతో చేసే స్పైసీ వంటకం 'ఎమా దత్షి'. ఆహారప్రియులకు ఎంతగానో నచ్చే ఈ డిష్.. భూటాన్ జాతీయ వంటకం కూడా.
ఇంకొన్ని వంటలు: గ్లోబల్‌ కాఫీగా పిలిచే 'ఫ్లాట్‌ వైట్‌ కాఫీ', నార్త్ ఇండియా వంటకమైన 'కాంజీ', మైదాపిండితో చేసే 'షక్కర్‌పరా', కొబ్బరి, ఎండుమిర్చి, చింతపండులతో ఇడ్లీ, దోశల కోసం చేసే 'చమ్మంది' చట్నీ కూడా ఎక్కువ వెతికిన వంటలుగా 2024లో నిలిచాయి.
గూగుల్ సెర్చ్లో ఇంట్రెస్టింగ్ టాపిక్స్- ఈ ఏడాది ఎక్కువగా ఏం సెర్చ్ చేశారో తెలుసా?
మరణాన్ని ఆపగలికే క్లాక్..!- దీనితో 'డెత్ డేట్' తెలుసుకో.. తలరాతను మార్చుకో..!
