Vankaya Menthikaram Recipe in Telugu : భోజనంలోకి పప్పు, సాంబార్తో పాటు ఏదైనా ఒక వేపుడు ఉంటే తృప్తిగా తినచ్చు. ఈ క్రమంలోనే చాలా మంది బెండకాయ, దొండకాయ, చిక్కుడుకాయ, క్యారెట్ ఫ్రై వంటివి చేస్తుంటారు. అయితే, ఎప్పుడూ ఒకేలా కాకుండా ఈసారి లేత వంకాయలతో మెంతికారం చేసేయండి. ఈ వంకాయ మెంతికారం పప్పు, సాంబార్, రసంతో చాలా రుచిగా ఉంటుంది. మరి సింపుల్గా టేస్టీగా వంకాయ మెంతికారం ఎలా చేయాలో ఇప్పుడు చూద్దాం.
కావాల్సిన పదార్థాలు :
- వంకాయలు - 10
- మెంతులు - పావు టీస్పూన్
- ధనియాలు - 2 టేబుల్స్పూన్లు
- జీలకర్ర - టీ స్పూన్
- పచ్చిశనగపప్పు - టేబుల్స్పూన్
- మినప్పప్పు - టేబుల్స్పూన్
- ఆయిల్ - 2 టేబుల్స్పూన్లు
- కరివేపాకు - 2 రెమ్మలు
- ఉప్పు - రుచికి సరిపడా
- పసుపు - అరటీస్పూన్
- ఎండుమిర్చి - 4
- కొత్తిమీర తరుగు - కొద్దిగా
తయారీ విధానం :
- ముందుగా లేత వంకాయలను శుభ్రంగా కడగండి. ఆపై నాలుగు ముక్కలుగా కట్ చేసి ఉప్పు నీటిలో నానబెట్టుకోండి. (ఇలా కట్ చేసిన వంకాయ ముక్కలను సాల్ట్ వాటర్లో నానబెట్టుకోవడం వల్ల రంగు మారకుండా ఉంటాయి.)
- ఈ వంకాయ మెంతికారం చేయడానికి లేత వంకాయలను ఉపయోగిస్తే క్రరీ చాలా రుచిగా ఉంటుంది.
- ఇప్పుడు స్టవ్పై పాన్ పెట్టి ముందుగా మెంతులు వేసి కాస్త ఫ్రై చేసి ఓ ప్లేట్లోకి తీసుకోండి. ఆపై ధనియాలు వేసి కాసేపు ఫ్రై చేయండి. వీటిని ప్లేట్లోకి తీసుకోండి.
- అనంతరం పాన్లో జీలకర్ర, పచ్చిశనగపప్పు, మినప్పప్పు వేసి దోరగా వేపుకోండి. ఇవి చక్కగా వేగిన తర్వాత ప్లేట్లోకి తీసుకోండి.
- ఇదే పాన్లో ఎండుమిర్చి వేపి పక్కన ఉంచుకోండి. ఈ మిశ్రమం చల్లారిన తర్వాత మిక్సీ గిన్నెలో వేసి మెత్తగా గ్రైండ్ చేసుకోండి.
- ఇప్పుడు స్టవ్పై కడాయి పెట్టి ఆయిల్ వేసి వేడి చేయండి. ఇందులో కట్ చేసిన వంకాయ ముక్కలు వేసి వేపండి. కాసేపటికి పసుపు, రుచికి సరిపడా ఉప్పు వేసి ప్రై చేయండి.
- వంకాయలు మాడిపోకుండా మధ్యమధ్యలో కలుపుతూ మూత పెట్టి మగ్గించుకోండి.
- వంకాయలు మెత్తగా ఉడికిన తర్వాత ఇందులో కరివేపాకు వేసి కలపండి.
- అనంతరం ముందుగా గ్రైండ్ చేసుకున్న మెంతి కారం పొడి వేసుకుని బాగా కలుపుకోండి.
- ఒక రెండు నిమిషాల తర్వాత కాస్త కొత్తిమీర తరుగు చల్లి స్టవ్ ఆఫ్ చేయండి. అంతే ఇలా సింపుల్గా చేసుకుంటే అద్దిరిపోయే వంకాయ మెంతికారం మీ ముందుంటుంది.
- ఈ వంకాయ మెంతికారం నచ్చితే మీరు ఓసారి ఇంట్లో ట్రై చేయండి.
మెత్తటి ముక్కలతో నోరూరించే మటన్ ఫ్రై - ఇలా చేసి చూడండి టేస్ట్ అదిరిపోతుంది!
కందతో కూరలే కాదు అద్దిరిపోయే కారం పొడి కూడా చేసుకోవచ్చు - టిఫిన్స్లోకి సూపర్ టేస్ట్
