சுடும் பாலை சிறுமியின் மீது ஊற்றிய நிதி நிறுவன ஊழியர்கள்: கொந்தளித்த மாதர் சங்கம்!

விருதுநகர்: ராஜபாளையத்தில் வாங்கிய கடனுக்கு தவணை செலுத்தவில்லை எனக் கூறி சிறுமியின் மீது சுடும் பாலை ஊற்றிய நிதி நிறுவனத்தின் மீது நடவடிக்கை எடுக்கக் கூறி அனைத்திந்திய மாதர் சங்கத்தினர் கோரிக்கை வைத்துள்ளனர்.

விருதுநகர் மாவட்டம் ராஜபாளையம் நகர் மற்றும் ராஜபாளையம் ஊராட்சி பகுதிகளில் மைக்ரோ நிதி நிறுவனத்தினர் மகளிர் சுய உதவிக் குழுவினருக்கும், சிறிய தொழில் செய்பவர்களுக்கும் 10 ஆயிரம் முதல் 50 ஆயிரம் ரூபாய்வரை கொடுத்து வசூல் செய்து வருகின்றனர்.

இதில் சிலர் கரோனா காலத்தில் பணம் கட்ட கால கெடு கொடுத்த நிலையில் தற்போது கடன் வாங்கியவர்கள் திருப்பி கட்டி வருகின்றனர். இந்நிலையில் ராஜபாளையம் அரசு மருந்துவமனை அருகில் டீக்கடை நடத்தி வருபவர் மாங்குடி பகுதியைச் சேர்ந்த அர்ஜுனன். இவரது மனைவி கலாவதி. இவர்கள், எல் & டி மைக்ரோ நிதி நிறுவனத்தில் 35 ஆயிரம் ரூபாய் கடன் பெற்றுள்ளனர்.

சிறுமியின் மீது சுடும் பாலை ஊற்றிய ஊழியர்கள்:

வாரந்தோறும் தொடர்ந்து தவணை கட்டி வரும் நிலையில் கடந்த இரண்டு மாதங்களாக குடும்ப சூழல் காரணமாக தவணை கட்ட முடியவில்லை. இதனால், நேற்று முன்தினம் (ஜன.04) ஆயிரத்து 950 ரூபாய் தவணைக்கு, ஆயிரத்து 300 ரூபாய் கட்டியுள்ளனர். மீதி பணம் 650 ரூபாயை நேற்று (ஜன.05) கொடுத்துள்ளனர்.

அப்போது ஜனவரி மாத தவணையும் கட்ட வேண்டும் என நிதி நிறுவன ஊழியர்கள் கூறியதால் இருதரப்பினருக்குமிடையே வாக்குவாதம் ஏற்பட்டது. அப்போது டீ கடையில் இருந்த சுடும் பாலை எடுத்து தம்பதியின் கண் முன்னே அவர்களது மகள் மீது ஊற்றியுள்ளனர்.

இதில் பலத்த காயமடைந்த சிறுமியை மீட்ட தம்பதி உடனடியாக ராஜபாளையம் அரசு மருத்துவமனைகு சிகிச்சைக்காக அழைத்துச் சென்றனர். தற்போது சிறுமி மருத்துவமனையில் சிகிச்சைப் பெற்று வருகிறார்.

பொதுமக்களை அசிங்கப்படுத்தும் ஊழியர்கள்:

இச்சம்பவம் குறித்து பாதிக்கப்பட்ட சிறுமியின் தாயார் கலாவதி கூறுகையில், “பணம் கட்ட முடியாத சூழலில் உள்ள பொதுமக்களை, நிதி நிறுவன ஊழியர்கள் அடியாள்களை கொண்டு மிரட்டி வருகின்றனர். மிக தரம் தாழ்ந்த வார்த்தைகளை பேசி வருகின்றனர்” எனத் தெரிவித்தார்.

மேலும் இது குறித்து ராஜபாளையம் பகுதி அனைத்திந்திய மாதர் சங்கம் சார்பில் கூறுகையில், “மைக்ரோ நிதி நிறுவனங்கள் கந்துக்வட்டிகாரர்களை காட்டிலும் கொடுமையாக நடந்து கொள்கின்றனர். அவதூறாகவும் பேசி அசிங்கப்படுத்தி வருகின்றனர்.

தற்போது உச்சக்கட்டமாக சிறுமி மீது சுடும் பாலை ஊற்றி காயப்படுத்தியுள்ளனர். இவர்கள் மீது உடனடியாக கடும் நடவடிக்கை எடுக்க வேண்டும். இல்லையெனில், மாதர் சங்கத்தினர் சார்பில் தமிழ்நாடு முழுவதும் போராட்டம் நடைபெறும்” என்றனர்.

இதையும் படிங்க: நிதி நிறுவனம் மூலம் ரூ. 4,750 கோடி மோசடி செய்தவர் சேலத்தில் கைது