விழுப்புரத்தில் ரூ.65 கோடி மதிப்பில் புதிதாக கட்டப்பட்டுள்ள சட்டக் கல்லூரி வளாகத்தை அமைச்சர் சி.வி.சண்முகம் இன்று ஆய்வு செய்தார். பின்னர் செய்தியாளர்களை சந்தித்து பேசுகையில் அவர் , “அதிமுக வாரிசுகளின் இயக்கமல்ல தொண்டர்களின் இயக்கம். தொண்டர்களின் உணர்வுகளுக்கு மதிப்பளிக்கக்கூடிய இயக்கம். எம்ஜிஆர், ஜெயலலிதா ஆகியோர் தொண்டர்களின் உணர்வுகளுக்கு மதிப்பளித்து கட்சியை வழிநடத்தினர்.
தொண்டர்களின் உணர்வுகளை பிரதிபலிக்கும் இடம் பொதுக்குழு. பொதுக்குழுவில் கொண்டுவரப்பட்ட தீர்மானத்தின்படி கட்சியும், ஆட்சியும் சிறப்பாக நடைபெற்று வருகிறது. தனக்கு பின் யாரையும் ஜெயலலிதா கைகாட்டிவிட்டு செல்லவில்லை. இது சங்கரமடமோ, திமுகவோ அல்ல.
மக்களவைத் தேர்தல் தோல்வியை முழுமையாக ஏற்றுக்கொள்கிறோம். பாஜகவுடன் கூட்டணி வைத்தது மட்டுமே தேர்தல் தோல்விக்கு காரணமல்ல. பாஜக தமிழர்களுக்கு எதிரான செயல்களில் ஈடுபடுவது போல கடந்த இரண்டு ஆண்டுகளாக திமுக உள்ளிட்ட எதிர்கட்சிகள் பொய் பிரசாரம் செய்து வருகின்றன. இந்த குற்றச்சாட்டை பாஜக முறையாக கையாளவில்லை.
பாஜக மீதான அதிருப்தி அதிமுகவையும் பாதித்தது. அதனால்தான் எங்களுக்கு தோல்வி ஏற்பட்டது. மேலும், சிறுபான்மையினர் வாக்குகளையும் முழுமையாக இழக்க நேரிட்டது. தமிழ்நாட்டில் சிறுபான்மையினருக்கு பாதுகாப்பாக இருக்கும் ஒரே கட்சி அதிமுக மட்டுமே. திமுக போல் நாங்கள் இரட்டை வேடம் போடுபவர்கள் அல்ல" என்றார்.
