விழுப்புரத்திலிருந்து 10 கி.மீ தொலைவிலுள்ள அரசூரை 70 கி.மீ தொலைவில் உள்ள கள்ளக்குறிச்சி மாவட்டத்தோடு இணைப்பதைக் கைவிட்டு, விழுப்புரம் மாவட்டத்திலேயே தொடரச் செய்ய வேண்டும், விழுப்புரத்திலிருந்து 16 கி.மீ தொலைவில் உள்ள திருவெண்ணெய்நல்லூர் மற்றும் அதனைச் சுற்றியுள்ள மடப்பட்டு, பெரியசெவலை சித்தலிங்கமடம், திருநாவலூர், முகையூர் போன்ற பகுதிகளை உள்ளடக்கி திருவெண்ணெய் நல்லூரை தனி தாலுக்காவாக அறிவிக்க வேண்டும் என்பன உள்ளிட்ட கோரிக்கைகளை வலியுறுத்தி, பல்வேறு கட்சிகளின் சார்பில் சென்னை-திருச்சி தேசிய நெடுஞ்சாலையில் ஆயிரக்கணக்கான பொதுமக்கள் கூடி கண்டன ஆர்ப்பாட்டத்தில் ஈடுபட்டனர்.
இதுகுறித்து போராட்டக்காரர்கள் சார்பில் கூறியதாவது, ”கடந்த 9 மாதங்களாக திருவெண்ணெய்நல்லூர், திருநாவலூர், முகையூர் ஆகிய பகுதிகளை விழுப்புரம் மாவட்டத்துடன் இணைக்க வேண்டி 5,000க்கும் மேற்பட்ட மனுக்களை விழுப்புரம் மாவட்ட ஆட்சியர், முதலமைச்சர் உள்ளிட்டோருக்கு அனுப்பியும் எந்தவித பதிலும் இல்லை.
இதைத்தொடர்ந்து மனிதச் சங்கிலி, கண்டன ஆர்ப்பாட்டம், கையெழுத்து இயக்கம், கருப்புக்கொடி போராட்டம் உள்ளிட்டவை நடத்தியும் பலனில்லை. இனிமேலாவது காலம் தாழ்த்தாமல் இந்தப் பகுதிகளை விழுப்புரம் மாவட்டத்துடன் இணைக்க முதலமைச்சரும், உளுந்தூர்பேட்டை சட்டப்பேரவை உறுப்பினரும் உரிய நடவடிக்கை எடுக்க வேண்டும். அப்படி நடவடிக்கை எடுக்காவிட்டால் விழுப்புரம் மாவட்டத்துடன் இணைக்கும்வரை தொடர் போராட்டம் நடைபெறும்” என்றனர்.
போராட்டத்திற்கு முன்னதாக ஏராளமான காவல் துறையினர் போராட்டக்காரர்களுடன் பேச்சுவார்த்தை நடத்தினர்.
இதையும் படிங்க: திருவெண்ணைநல்லூர் பேரூராட்சி - விழுப்புரம் மாவட்டத்துடன் இணைக்க கோரிக்கை
