விழுப்புரம்: சாலாமேடு பகுதியைச் சேர்ந்த ரவிராஜன் (வயது 37) வங்கி ஊழியராகப் பணியாற்றி வருகிறார். இவருக்கு கடந்த மார்ச் 19-ம் தேதியன்று, செல்போன் வாட்ஸ்அப் வாயிலாக ஒரு குறுந்தகவல் வந்துள்ளது. அந்த குறுந்தகவலில், பகுதி நேர வேலை இருப்பதாகவும், இதனை செய்தால் இரட்டிப்பு லாபம் பெறலாம் எனவும் குறிப்பிடப்பட்டு வந்துள்ளது.
இதைத்தொடர்ந்து, ரவிராஜனின் டெலிகிராம் ஐ.டி.யை மர்ம நபர்கள் தொடர்பு கொண்டுள்ளனர். அந்த பகுதி நேர வேலை குறித்த ஒரு லிங்கையும் அனுப்பியுள்ளனர். இதைக் கண்ட ரவிராஜன், அந்த லிங்கிற்குள் சென்றுள்ளார். மேலும், அதில் புதிய கணக்கை தொடங்குவதற்காக பாஸ்வேர்ட் மற்றும் யூசர் ஐ.டி.யையும் பதிவு செய்துள்ளார்.
இதனைத் தொடர்ந்து ரவிராஜனை தொடர்புகொண்ட மர்ம நபர்கள், கிரிப்டோ கரன்சியில் நீங்கள் சிறிய தொகையை முதலீடு செய்தால் அதிக லாபம் தருவதாகக் கூறியுள்ளனர். இதனை உண்மை என நம்பிய ரவிராஜன், முதலில் 1,000 ரூபாயை முதலீடு செய்து, ரூ. 1,580ஆக இலாபம் பெற்றுள்ளார். பின் இரண்டாவது முறையாக ரூ. 3,000 செலுத்தி, ரூ. 4,930ஆக இலாபம் அடைந்துள்ளார்.
இதனால்,இதனை உண்மை என நம்பிய ரவிராஜன், அதன் பிறகு சில நாட்கள் கழித்து, குறிப்பிட்ட அந்த மர்ம நபர் அனுப்பக் கூறிய வங்கி கணக்கிற்கு, தவணைகளாக ரூபாய் 1 லட்சத்து 89 ஆயிரத்து 500-ஐ அனுப்பியுள்ளார். தான் அனுப்பிய பணத்திற்கு அதிக லாபத்துடன் மீண்டும் தன்னுடைய வங்கிக் கணக்கிற்கு பணத்தை அனுப்புவார்கள் என ரவி ராஜன் எண்ணியிருந்தார்.
இதனால், தனக்கு குறுந்தகவல் வந்த தொலைபேசி எண்ணிற்கும், தன்னிடம் பேசிய மர்ம நபருக்கும் அவர் பலமுறை தொடர்பு கொண்டுள்ளார். ஆனால், அவருக்கு பணமோ அல்லது அது குறித்த தகவலோ வரவில்லை. அதன் பின் தான், கிரிப்டோ கரன்சியில் முதலீடு செய்தால் அதிக லாபம் பெறலாம் என்று கூறி மர்ம நபர்கள், தன்னிடம் பண மோசடி செய்திருப்பதை ரவிராஜன் அறிந்து கொண்டார்.
இதனால் அதிர்ச்சி அடைந்த இவர், இதுகுறித்து விழுப்புரம் மாவட்ட குற்றப்பிரிவு சைபர் கிரைம் போலீசில் புகார் செய்துள்ளார். அதன்பேரில், போலீசார் வழக்குப்பதிவு செய்து மர்ம நபர்களை தேடி வருகின்றனர்.
