ஸ்பிரே மூலம் மயக்க மருந்து அடித்து நகை, பணம் கொள்ளை!

வேலூர்: வீட்டில் உறங்கிக் கொண்டிருந்தவர்கள் மீது ஸ்பிரே மூலம் மயக்க மருந்து அடித்து தங்க நகை கொள்ளையடிக்கப்பட்ட சம்பவம் பெரும் பரபரப்பை ஏற்படுத்தியுள்ளது.

வேலூர் மாவட்டம் நாட்றம்பள்ளி அடுத்த வெள்ளாளனூர் பகுதியை சேர்ந்தவர் பாபு. இவர் பெங்களூரில் தனியார் கம்பெனியில் வேலை செய்து வருகிறார். பாபு தனது வீட்டில் குடும்பத்தாருடன் உறங்கி கொண்டிருந்தார். அப்போது அவரது வீட்டில் நுழைந்த அடையாளம் தெரியாத நபர்கள் உறங்கி கொண்டிருந்தவர்களின் மீது ஸ்பிரே மூலம் மயக்க மருந்து அடித்து பீரோவில் இருந்து சுமார் 11 சவரன் தங்க நகைகள், வெள்ளி பெருட்கள், பணம் உள்ளிட்டவைகளை திருடி சென்றனர்.

இன்று காலை வழக்கம்போல எழுந்த பாபு, பீரோவை திறந்து பார்த்தபோது நகைகள், பணம் திருடு போனதை கண்டு அதிர்ச்சி அடைந்தார். பின்னர் இதுகுறித்து பாபு நாட்றம்பள்ளி காவல்துறையினருக்கு தகவல் அளித்தார். இதையடுத்து சம்பவ இடத்திற்கு வந்த காவல்துறையினர், அக்கம்பக்கத்தினர் மற்றும் குடும்பத்தினரிடம் விசாரணை மேற்கொண்டனர். வீட்டில் உறங்கி இருந்தவர்கள் மீது மயக்க மருந்து அடித்து நகை, பணம் திருடி சென்ற சம்பவம், அப்பகுதியில் அச்சத்தையும் ஏற்படுத்தியுள்ளது.