திருச்சி மாவட்டம் திருவெறும்பூர் அருகே உள்ள சூரியூரில் ஜல்லிக்கட்டுப் போட்டியை மாவட்ட ஆட்சியர் சிவராசு கொடியசைத்து தொடங்கிவைத்தார். ஜல்லிக்கட்டுப் போட்டியில் 600 காளைகளும் 500 மாடுபிடி வீரர்களும் களத்தில் உள்ளனர்.
மேலும், மாவட்ட காவல் துறை கண்காணிப்பாளர் ஜியாவுல் ஹக் தலைமையில் 500-க்கும் மேற்பட்ட காவல் துறையினர் பாதுகாப்புப் பணியில் ஈடுபட்டுள்ளனர்.
திருச்சி, தஞ்சை, திண்டுக்கல் புதுக்கோட்டை அரியலூர், திருவாரூர் உள்ளிட்ட பல்வேறு மாவட்டங்களிலிருந்து இளைஞர்கள் உள்ளிட்ட ஆயிரக்கணக்கான பொதுமக்கள் ஜல்லிக்கட்டு நிகழ்ச்சியைப் பார்த்து ரசித்துவருகின்றனர்.
மாடுகள் முட்டியதில் பல வீரர்களுக்கு காயம் ஏற்பட்டு அங்கு அமைக்கப்பட்டிருக்கும் மருத்துவ முகாமில் சிகிச்சை அளிக்கப்பட்டுவருகிறது. இந்நிலையில், திருச்சி உறையூரைச் சேர்ந்த ரவிச்சந்திரன் என்பவரது மனைவி ஜோதிலட்சுமி (60) பார்வையாளர் மாடத்திலிருந்து வேடிக்கைப் பார்த்துக் கொண்டிருந்தார்.
அப்போது சீறிப்பாய்ந்துவந்த காளை ஒன்று அவரை முட்டித் தள்ளியது. இதில், படுகாயமடைந்த அவர் உடனடியாக மீட்கப்பட்டு முதலுதவிக்காக அங்குள்ள மருத்துவ முகாமிற்கு அழைத்துச் செல்லப்பட்டார். அவருக்கு பலத்த காயம் ஏற்பட்டுள்ளதால், திருச்சி அரசு மருத்துவமனைக்கு அனுப்பிவைத்தனர். அங்கு ஜோதிலட்சுமிக்கு தீவிர சிகிச்சை அளிக்கப்பட்டுவருகிறது.
இதையும் படிங்க: விளையாட்டு காட்டிய புதுகை மாடு... 14 காளைகளை அடக்கிய ஜெய்ஹிந்த்புரம் விஜய்!
