பிரதமர் கிசான் திட்ட ஊழலுக்கு மத்திய அரசே முழுப்பொறுப்பேற்க வேண்டும் - பி.ஆர்.பாண்டியன்

திருவாரூர் : பிரதமர் கிசான் திட்ட ஊழலுக்கு மத்திய அரசுதான் பொறுப்பேற்க வேண்டும் என தமிழக அனைத்து விவசாயிகள் ஒருங்கிணைப்பு குழு தலைவர் பி.ஆர்.பாண்டியன் வலியுத்தியுள்ளார்.

மன்னார்குடியில் செய்தியாளர்களை சந்தித்த அவர் கூறுகையில், "மத்திய அரசு கடந்த 2019ஆம் ஆண்டு முதல் பிரதம மந்திரி கிசான் என்ற பெயரில் ஒவ்வொரு விவசாய குடும்பத்திற்கும் ஆண்டொன்றுக்கு ரூ.6000/- வீதம் 3 தவணைகளாக வழங்கும் வகையில் சிறப்பு திட்டத்தை அறிவித்தது.

தமிழ்நாட்டில் மொத்தம் 1.25 கோடி குடும்பங்கள் விவசாயப் பணிகளில் முழுமையாக ஈடுபட்டு வரும் நிலையில் கடந்த 2019 ஆம் ஆண்டில் தமிழ்நாடு வேளாண் துறை மூலமாக முதற்கட்டமாக 25 லட்சம் குடும்பங்கள் தேர்வு செய்யப்பட்டு நிதி வங்கிகள் மூலம் வழங்கப்பட்டது.

மாநில அரசுகள் இதன் மூலமாக செல்வாக்கு அடைவதாக நினைத்த மத்திய அரசு, தாங்கள் தான் இதற்கு நிதி கொடுக்கிறோம் என்பதை விவசாயிகளுக்கு உணர்த்தும் வகையில் தங்கள் மூலமாக வழங்க நேரடியாக இணையத் தளம் வழியே பதிவு செய்து கொள்ள அனுமதி வழங்கியது.

மத்திய அரசின் அரசியல் ஆதாயம் தேடும் முயற்சியை தங்களுக்கு சாதகமாக பயன்படுத்திக் கொண்டு வேளாண் உதவி அலுவலர்கள் மற்றும் இடைத்தரகர்கள், துணையோடு விவசாயி என்ற பெயரில் போலி நபர்களின் பெயர்களைப் பதிவேற்றம் செய்தனர். இந்த முறைகேடு விளைவாக 40 லட்சம் பயனாளிகளின் எண்ணிக்கை உயர்ந்தது.

மத்திய அரசால் ஒதுக்கப்படும் நிதிகள் மூலம் அறிவிக்கப்படும் திட்டங்கள் கூட்டாட்சி தத்துவ அடிப்படையில் மாநில அரசுகள்தான் நேரடியாக மக்களுக்கு கொண்டு செல்வதே இதுவே நடைமுறையாக இருந்த நிலையில் அரசியல் ஆதாயத்திற்காக மத்திய அரசு எடுத்த முயற்சி மிகப்பெரும் ஊழலாக மாறிவிட்டது. இதற்கு மத்திய அரசுதான் பொறுப்பேற்க வேண்டும்.

கிசான் கிரெடிட் கார்டு உள்ளவர்கள் மட்டுமே தான் வேளாண் திட்டங்கங்களின் பயனை பெற முடியும் என இரண்டு ஆண்டுகளுக்கு முன்னரே மத்திய அரசு அறிவித்தது.ங

ஆனால், தமிழ்நாட்டில் 1984ஆம் ஆண்டுக்கு பிறகு நில உடமை பதிவேடுகள் மறுவகைப்பாடு செய்து, இன்றைய நிலைக்கு ஏற்ப இணையத்தில் பதிவேற்றம் செய்யப்படாததால் 60% விவசாய குடும்பங்கள் பயன் பெற முடியாத நிலை நீடிக்கிறது. அவர்களால் கிசான் கிரெடிட் கார்டு பெற இயலவில்லை.

இதனால் விவசாயிகளுக்கு ஒதுக்கப்படும் நிதியில் 50% ஊழல் முறைகேட்டில் முடிந்து விடுகிறது.

எனவே, தமிழ்நாடு அரசு உடனடியாக நில உடமை பதிவேடுகளை மறுவகைபாடு செய்து, விவசாயத்தில் ஈடுபடும் அனைவருக்கும் உடனடியாக ஆதார் கார்டுக்கு இணையான கிசான் கிரடிட் கார்டுகளை வேளாண் துறை மூலம் வழங்கப்பட வேண்டும்.

அவற்றின் மூலம் மட்டுமே கடன் உள்ளிட்ட அனைத்து சலுகைகளும் ஊழல் முறைகேடின்றி சென்றடைவதை உறுதிப்படுத்த வேண்டும்.

அதுவரையில் வருவாய் துறை சான்றுகளை பெற்று பழைய நடைமுறையில் பயனாளிகள் தேர்வை மாநில அரசு துறை மூலம் தொடர மத்திய, மாநில அரசுகள் முன்வர வேண்டும்" என வலியுறுத்தினார்.,