சட்டப்பேரவைக்கு குட்கா கொண்டு வந்த விவகாரம் தொடர்பான உரிமை மீறல் நோட்டீசை எதிர்த்து எதிர்கட்சித் தலைவர் ஸ்டாலின் உள்பட 21 எம்எல்ஏக்கள் தாக்கல் செய்த வழக்கு, தலைமை நீதிபதி ஏ.பி.சாஹி தலைமையிலான அமர்வில் நேற்று (ஆக. 13) இரண்டாவது நாளாக விசாரணைக்கு வந்தது.
அப்போது, அரசுத் தரப்பில் ஆஜரான தலைமை வழக்கறிஞர் விஜய் நாராயண், பெரும்பான்மை குறைவாக இருந்ததால்தான் திமுகவை சேர்ந்த 21 சட்டப்பேரவை உறுப்பினர்களுக்கு எதிராக உரிமை மீறல் நோட்டீஸ் வழங்கப்பட்டதாக கூறுவது தவறு எனவும், ஆரம்பம் முதல் இதுநாள் வரை ஆளும் அரசு எந்த தருணத்திலும் பெரும்பான்மையை இழக்கவில்லை எனவும் தெரிவித்தார்.
தற்போதைய நிலையில் 124 சட்டப்பேரவை உறுப்பினர்கள் அரசுக்கு ஆதரவாக உள்ளதாகவும், பேரவையில் தொடர்ந்து பெரும்பான்மையோடு செயல்படுவதாகவும் சுட்டிக்காட்டிய அவர், அவையின் மாண்பை அவமதிக்கும் வகையில் தடை செய்யப்பட்ட குட்கா பொருளை சட்டப்பேரவைக்குள் கொண்டு வந்ததற்காகவே 21 திமுக சட்டப்பேரவை உறுப்பினர்கள் மீது நடவடிக்கை எடுக்க வலியுறுத்தி சபாநாயகர் உரிமைக்குழு விசாரணைக்கு பரிந்துரைத்தார் என்றார்.
இதனைத் தொடர்ந்து ஆஜரான தமிழ்நாடு அரசின் சிறப்பு மூத்த வழக்கறிஞர் சோமையாஜி, உரிமைக்குழு இந்த பிரச்னை மீது எந்த உத்தரவும் பிறப்பிக்காத நிலையில் முன்கூட்டியே இந்த வழக்கு தாக்கல் செய்யப்பட்டுள்ளதாகவும், சபையின் கண்ணியத்தை மீறும் வகையில், தடை செய்யப்பட்ட பொருளை கொண்டு வந்தது, உரிமை மீறலா இல்லையா? என ஆய்வு செய்யவே சபாநாயகர் இந்த விவகாரத்தை உரிமைக் குழுவிற்கு அனுப்பிவைத்ததாகவும் வாதிட்டார்.
இந்த பிரச்னை ஏற்கனவே பலமுறை சட்டப்பேரவையில் எழுப்பப்பட்டு, அரசு சார்பில் உரிய பதிலும் அளிக்கப்பட்டுள்ளதாக சுட்டிக்காட்டிய அவர், அரசியல் சாசன பதவி வகிக்கும் சட்டப்பேரவை உறுப்பினர்கள், அவையின் கண்ணியத்தை காக்க வேண்டும் என உச்ச நீதிமன்ற தீர்ப்புகளை மேற்கோள் காட்டி வாதிட்டார்.
அவரது வாதம் முடிவடையாததால் விசாரணை இன்று (ஆக. 14) மீண்டும் தொடரும் எனக் கூறி நீதிபதி உத்தரவிட்டார்.
