திருப்பூர் மாவட்டம் ஊத்துக்குளியை அடுத்த சொட்டகவுண்டம்பாளையம் பகுதியில் வசித்துவருபவர்கள் தங்கராஜ்-சுமதி தம்பதியினர். இவர்களுக்கு விக்னேஷ் (9), பவனேஷ்(8) என இரண்டு மகன்கள் உள்ளனர். பனியன் தொழிலாளியான இருவரும் ஜூன்11ஆம் தேதி காலை வழக்கம்போல் வேலைக்குச் சென்றுவிட்டு மாலை வீடு திரும்பியுள்ளனர். அப்போது வீட்டிலிருந்த பவனேஷ்ஷை காணவில்லை என்பதால் பதறியுள்ளனர்.
இதையடுத்து, சிறுவனின் பெற்றோர் அக்கம்பக்கத்தில் தேடியும் சிறுவனைக் கண்டுபிடிக்க முடியவில்லை. அதன்பின் இதுதொர்பாக ஊத்துக்குளி காவல் நிலையத்தில் புகார் அளித்தனர். புகாரின்பேரில், காவல் துறையினரும் சிறுவனைத் தேடிவந்தனர்.
இந்நிலையில், நேற்று (ஜூன் 12) காலை பல்லகவுண்டன் பாளையம் குளப்பகுதிக்குச் சென்றவர்கள், அங்கு வயிறு, கழுத்து பகுதிகளில் காயங்களோடு சிறுவன் ஒருவன் இறந்துகிடப்பதாக ஊத்துக்குளி காவல் துறையினருக்குத் தகவல் தெரிவித்துள்ளனர். தகவலறிந்து, சம்பவ இடத்திற்குச் சென்ற காவல் துறையினர், அச்சிறுவன் பவனேஷ் என்பதையும், அவன் குத்திக்கொலை செய்யப்பட்டுள்ளான் என்பதையும் உறுதிப்படுத்தினர். பின்னர் உடலை உடற்கூறாய்விற்காக மருத்துவமனைக்கு அனுப்பிவைத்தனர். இக்கொலை சம்பவம் தொடர்பாக ஏழு தனிப்படைகள் அமைத்து காவல் துறையினர் தீவிர விசாரணை மேற்கொண்டு வந்தனர்.
இச்சம்பவம் தொடர்பாக அதே பகுதியைச் சேர்ந்த பாலிடெக்னிக் மாணவர் அஜித் என்ற இளைஞரை சந்தேகத்தின் அடிப்படையில் காவல் துறையினர் பிடித்து, விசாரித்தனர். விசாரணையில், சிறுவனைக் கொலைசெய்ததாக ஒப்புக்கொண்ட அஜித், கடந்த வியாழன் அன்று அவரும் அவரது காதலியான 17 வயது சிறுமியும் புத்தூர்பள்ளபாளையம் குளத்தில் தனிமையில் இருந்ததை சிறுவன் பவனேஷ் பார்த்ததாகவும், அதனை ஊர் பெரியவர்களிடம் சொல்லிவிடுவான் என்ற பயத்தில் தாங்கள் இருவரும் சேர்ந்து சிறுவனைப் பாட்டிலால் குத்திக்கொலை செய்து பல்லகவுண்டன்பாளையம் குளத்தில் போட்டுச் சென்றதாகவும் கூறியுள்ளார்.
இதையடுத்து அஜித்தையும், அவரது காதலியையும் கைதுசெய்து காவல் துறையினர் விசாரணை நடத்திவருகின்றனர்.
இதையும் படிங்க: உ.பி-யில் கணவரை கொன்ற மனைவி கைது!
