திருப்பத்தூர்: வாணியம்பாடி அடுத்த புருஷோத்தம குப்பம் பகுதியைச் சேர்ந்தவர் பொறியியல் பட்டதாரி இளைஞர், ஆனந்தன் (28). இவர் சென்னையில் ஐடி நிறுவனத்தில் பொறியாளராகப் பணிபுரிந்து வந்துள்ளார்.
இவர் செல்போனில் ஆன்லைன் ரம்மி விளையாடி வீட்டிற்கும் பணம் கொடுக்காமல், பல லட்சம் ரூபாய் இழந்து வந்துள்ளார். இந்நிலையில் நேற்று (அக்டோபர் 9) ஊரக உள்ளாட்சித் தேர்தலில் வாக்குப் பதிவு செய்வதற்காக தனது கிராமத்திற்கு வந்துள்ளார்.
அப்போது தாய் மற்றும் சகோதரர் அவரை வீட்டிற்குப் பணம் கொடுக்காததாலும் ஆன்லைனில் ரம்மி விளையாடி கடனில் இருப்பதாலும் அவரைக் கண்டித்துள்ளனர். இதனால், மனம் உடைந்த இளைஞர் வீட்டில் தூக்கிட்டுத் தற்கொலை செய்து கொண்டுள்ளார்.
இது குறித்து தகவல் அறிந்த காவல் துறையினர், சம்பவ இடத்திற்குச் சென்று, ஆனந்தனின் உடலை மீட்டு உடற்கூராய்விற்காக திருப்பத்தூர் அரசு மருத்துவமனைக்கு அனுப்பி வைத்தனர். மேலும் இது குறித்து வழக்குப் பதிவு செய்து விசாரணை மேற்கொண்டு வருகின்றனர்.
