திருப்பத்தூர்: திருப்பத்தூரை அடுத்த அனுமந்த உபாசகர் தெருவைச் சேர்ந்த 16 வயது சிறுமியும், லட்சுமி நகர் பகுதியைச் சேர்ந்த சுகேஷ் (19) என்ற வாலிபரும், ஒருவரை ஒருவர் காதலித்து வந்ததாகத் தெரிகிறது. இந்த நிலையில், அனுமந்த உபாசகர் தெருவைச் சேர்ந்த செல்வம் மகன் கார்த்திக் (18), ஒரு தலைப்பட்சமாக அந்த 16 வயது சிறுமியை காதலித்து வந்ததாகக் கூறப்படுகிறது.
அதன் காரணமாக கடந்த 8ஆம் தேதி சுகேஷ், கார்த்திக்கின் வீட்டிற்குச் சென்று தான் அந்த 16 வயது சிறுமியை காதலித்து வருவதாகவும், ஆகையால் அவரை தொந்தரவு செய்யக்கூடாது என கூறி வந்ததாகவும் கூறப்படுகிறது. இதனால் ஆத்திரமடைந்த கார்த்திக், அவருடைய தந்தை செல்வம் (38) மற்றும் அவருடைய கூட்டாளிகள் பாலாஜி (20), தருமன் (25), முத்து (26) ஆகிய ஐந்து பேரும் சேர்ந்து, கட்டையால் சுகேஷை சாரமாரியாக தலையில் தாக்கி உள்ளனர்.
இதில், ரத்த வெள்ளத்தில் துடிதுடித்து கீழே விழுந்த சுகேஷை மீட்ட அக்கம் பக்கத்தினர், திருப்பத்தூர் அரசு மருத்துவமனைக்கு சிகிச்சைக்காக அனுப்பி வைத்தனர். அதனைத் தொடர்ந்து, மேல் சிகிச்சைக்காக பெங்களூரில் உள்ள தனியார் மருத்துவமனையில் அனுமதிக்கப்பட்டு சிகிச்சை பெற்று வந்த நிலையில், இன்று (நவ.13) சுகேஷ் சிகிச்சை பலனின்றி உயிரிழந்தார்.
இதையும் படிங்க: வித்தியாசம் வித்தியாசமா கடத்துறாங்கப்பா... திருச்சி விமான நிலையத்தில் ஜீன்ஸ் பேண்டில் கடத்தி வரப்பட்ட தங்கம் பறிமுதல்!
இதனை அறிந்த குடும்பத்தினர் மற்றும் சுகேஷின் நண்பர்கள் சுமார் 50க்கும் மேற்பட்டோர், திருப்பத்தூர் வழியாக வாணியம்பாடி செல்லும் பிரதான சாலையில் சாலை மறியலில் ஈடுபட முற்பட்டனர். ஆனால் அதற்கு முன்னரே சுமார் 30-க்கும் மேற்பட்ட போலீசார் குவிக்கப்பட்டு, அவர்களிடம் பேச்சுவார்த்தை நடத்தி மறியலில் ஈடுபட விடாமல் தடுத்து நிறுத்தினர்.
அதையடுத்து, கார்த்திக்கின் வீட்டிற்கு பலத்த போலீஸ் பாதுகாப்பும் போடப்பட்டு உள்ளது. மேலும், சுகேஷின் உடலை அடக்கம் செய்யும் வரை எந்த ஒரு அசம்பாவிதமும் நடைபெறாமல் இருக்க, போலீசார் பாதுகாப்பு பணியில் ஈடுபட்டு வருவது குறிப்பிடத்தக்கது.
இதையும் படிங்க: மது போதையில் நண்பனை கொலை செய்து விட்டதாக இளைஞர் போலீசில் சரண்.. நடந்தது என்ன?
