திருப்பத்தூர்: ஆம்பூர் அடுத்த பெரியவரிகம் பகுதியில் தனியார் காலணி தொழிற்சாலை ஒன்று இயங்கி வருகிறது. இந்த தொழிற்சாலையில் ஆண், பெண் என சுமார் ஆயிரத்துக்கும் மேற்பட்ட தொழிலாளர்கள் பணிபுரிந்து வருகின்றனர். இந்த நிலையில், இந்த தனியார் காலணி தொழிற்சாலையில் பணிபுரியும் தொழிலாளர்களுக்கு பல மாதங்களாக ஊதியம் தாமதமாக வழங்கப்பட்டு வருவதாகவும், மூன்று ஆண்டுகளுக்கும் மேலாக தொழிலாளர் வைப்பு நிதியானது தொழிலாளர் கணக்கில் செலுத்தப்படவில்லை என்றும் தொழிலாளர்கள் குற்றம் சாட்டி உள்ளனர்.
அது மட்டுமல்லாமல், காலணி தொழிற்சாலை இடமாற்றம் செய்யப்படுவதாக அறிவிப்பு வெளியானதாக கூறப்படுகிறது. இதன் காரணமாக காலணி தொழிற்சாலையில் பணிபுரியும் தொழிலாளர்கள் நேற்று (ஜூலை 12) இரவு முதல் பணி முடிந்து வெளியேறாமல் தொழிற்சாலை வளாகத்திலேயே உள்ளிருப்பு போராட்டத்தில் ஈடுபட்டு வருகின்றனர்.
மேலும், காலணி தொழிற்சாலையில் தொழிலாளர்கள் போராட்டத்தில் ஈடுபட்டு வருவதால் தொழிற்சாலை நிர்வாகம் கழிவறைக்குச் செல்லக் கூடிய குடிநீர் இணைப்பை துண்டித்து உள்ளதாக தொழிலாளர்கள் புகார் தெரிவிக்கின்றனர். இதனால் தொழிற்சாலையில் உள்ளிருப்பு போராட்டத்தில் ஈடுபட்டு வரும் தொழிலாளர்கள் அவதிக்குள்ளாகி உள்ளனர்.
இதனிடையே, போராட்டத்தில் ஈடுபட்டு வரும் தொழிலாளர்கள் உடன் ஆம்பூர் துணை காவல் கண்காணிப்பாளர் சரவணன் தலைமையிலான காவல் துறையினர் பேச்சு வார்த்தையில் ஈடுபட்டனர். ஆனால், காவல் துறையினரின் பேச்சு வார்த்தையில் உடன்பாடு ஏற்படாததால், தொடர்ந்து தொழிற்சாலை வளாகத்திலேயே சுமார் 500க்கும் மேற்பட்ட தொழிலாளர்கள் போராட்டத்தில் ஈடுபட்டு வருகின்றனர். இதனால் அப்பகுதியில் பெரும் பரபரப்பு நிலவி வருகிறது.
முன்னதாக, திருப்பத்தூர் மாவட்டம் ஆம்பூர் அடுத்த சோலூர் பகுதியில் பல ஆண்டுகளாக தனியார் காலணி தொழிற்சாலை இயங்கி வந்தது. இந்த நிலையில் கடந்த சில ஆண்டுகளுக்கு முன்பு இந்த தொழிற்சாலை திடீரென மூடப்பட்டு உள்ளது. இதன் காரணமாக மூடப்பட்ட இந்த தொழிற்சாலையில் பணிபுரிந்து வந்த தொழிலாளர்கள் வேலை இல்லாமல் தவித்து வந்து உள்ளனர்.
மேலும், தங்களுக்கு வழங்க வேண்டிய வைப்புத்தொகை மற்றும் பணிமுடிப்புகணக்கு தொகை (செட்டில்மென்ட்) பணத்தை வழங்கக் கோரி தொழிற்சாலை நிர்வாகத்திடம் பல முறை முறையிட்டு நீதிமன்றத்தில் வழக்கும் தொடுத்து உள்ளனர். இவ்வாறு எந்த வித நடவடிக்கையும் எடுக்காத நிலையில், கடந்த பிப்ரவரி மாதம் தொழிற்சாலை மீண்டும் திறக்கப்படுவதாக தகவல் கிடைத்துள்ளது.
இதனால் அங்கு பணிபுரிந்த தொழிலாளர்கள் தொழிற்சாலையின் முன்பு கூடினர். பின்னர், காவல் துறையினர் நடத்திய பேச்சுவார்த்தையின் அடிப்படையில், போராட்டத்தில் ஈடுபட்ட முன்னாள் தொழிலாளர்கள் அங்கு இருந்து கலைந்து சென்றனர்.
இதையும் படிங்க: திமுக பிரமுகர் லாட்டரி விற்பனை; இடதுசாரி அமைப்பினர் மீது கொலைவெறித் தாக்குதல்... நடந்தது என்ன?
