தூத்துக்குடி நாடாளுமன்றத் தொகுதி தேர்தலில் திமுக வேட்பாளர் கனிமொழியை ஆதரித்து திராவிடர் கழக தலைவர் கி.வீரமணி விளாத்திகுளம் மற்றும் கோவில்பட்டி சுற்றுவட்டார பகுதிகளில் பரப்புரை செய்தார். இதனைத்தொடர்ந்து தூத்துக்குடியில் நடைபெற்ற பொதுக்கூட்டத்தில் அவர் பேசுகையில்,
"இந்த தேர்தலில் கனிமொழி வெற்றிபெற வேண்டும் என்பதற்காக உதயசூரியன் சின்னத்திற்கு வாக்களிக்க வேண்டும் என கேட்கவில்லை.
தமிழ்நாட்டை மீட்க வேண்டும் என்பதற்காகவும், இந்தியாவை காக்க வேண்டும் என்பதற்காகவும்தான் உதயசூரியனுக்கு வாக்களியுங்கள் எனக் கூறுகிறேன். நாடுதோறும் பொள்ளாச்சி சம்பவங்களால் தலைகுனிவுதான் ஏற்படுகிறது.
தமிழ்நாட்டில் கொத்தடிமைகள் ஆட்சி நடைபெறுகிறது. தற்போது இந்தியாவில் மோடி வித்தை நடக்கிறது. அவர்களின் தேர்தல் அறிக்கையே தீராத விளையாட்டு பிள்ளைதான்.பெண்களுக்கு தொல்லைதான்.
இந்தியாவில் கடந்த 5 ஆண்டுகளில் 4.50 கோடி பேர் வேலை இழந்துள்ளனர். நாட்டின் எல்லா இடங்களிலும் தாக்குதல் நடந்துள்ளது.பிரதமர் மோடி இளைஞர்களை மட்டுமல்ல, விவசாயிகளையும் ஏமாற்றியுள்ளார்.
இந்த தேர்தலில் பாஜக ஜெயித்தால் ஜனநாயகத்தின் சவபெட்டிக்கு ஆணி அடிப்பது போன்றது. அரசியல் கட்சியினர் எங்கு லாபம் என்று பார்த்து தேர்தலில் தங்களை விற்று கொள்கிறார்கள். பிரதமர் மோடி ஊழல்வாதிகளை வைத்துக்கொண்டே ஊழலை ஒழிப்போம் எனக் கூறுகிறார். நாட்டில் வேலைவாய்ப்பும் இல்லை. பெண்களுக்கு பாதுகாப்பும் இல்லை" எனப் பேசினார்.
