தூத்துக்குடி: கோவில்பட்டியில் உள்ள தனியார் பொறியியல் கல்லூரி தொடங்கப்பட்டு 38 ஆண்டுகளை கடந்த நிலையில், கல்லூரி ஆண்டு விழா, கல்லூரியிலுள்ள கலையரங்கில் பல்வேறு கலை நிகழ்ச்சிகளுடன் நடைபெற்றது. இந்நிகழ்ச்சியில் சிறப்பு விருந்தினராக திருவனந்தபுரம் இந்திய விண்வெளி ஆராய்ச்சி திரவ இயக்க திட்ட மையத்தின் இயக்குநர் வி.நாராயணன் பங்கேற்றார்.
அப்போது அவர் செய்தியாளர்களைச் சந்தித்துக் கூறியதாவது, "சந்திரயான்-3 செயற்கைக்கோள் புரோபெல்சன் மாடல் (உந்துவிசை தொகுதி), விக்ரம் லேண்டர், ரோவர் ஆகிய 3 பாகங்கள் கொண்டது. இது மொத்தம் 3,900 கிலோ எடை கொண்டது. இதில் 6 கருவிகள் உள்ளன. மொத்தம் 4 நாடுகள் நிலவில் தரையிறங்கி உள்ளன. இதில் இந்தியா 4வது நாடு. ஆனால், தென் துருவத்தில் தரையிறங்கிய முதல் நாடு இந்தியாதான். இது இஸ்ரோவிற்கும், இந்தியாவிற்கும் மிகப்பெரிய சாதனையாகும்.
இதனால் அனைத்து நாடுகளும் இந்தியாவை வியந்து பார்த்தன. தரையிறங்கிய 3 மணி நேரத்துக்குப் பின்னர், ரோவரில் பொருத்தப்பட்டிருந்த சோலார் மூலம் மின்சாரம் உற்பத்தி செய்து, தற்போது வரை 100 மீட்டர் வரை பயணம் செய்துள்ளது. இதில், முதல் கண்டுபிடிப்பு நிலவில் உள்ள தரையில் 60 டிகிரி செ.கி. வெப்பம் உள்ளது என்பதுதான். இரண்டாவதாக நிலவில் உள்ள பிளாஸ்மா, அதாவது 300 லட்சம் எலக்ட்ரான் ஒரு மீட்டர் க்யூப் வளைவுக்குள் இருக்கிறது என்றுதான்.
மூன்றாவதாக நிலவின் 6 இடங்களில் அதிர்வு இருப்பது கண்டுபிடிக்கப்பட்டது. குரோமியம், சிலிக்கான், சல்பர், டைட்டானியம் உள்ளிட்ட 8 தாதுப் பொருட்கள் இருக்கிறது. ஆகவே, சந்திரயான் - 3 திட்டம் என்பது 100 சதவீதம் வெற்றிகரமான திட்டமாகும். இந்த திட்டம் இந்தியர்களை ஒருமைப்படுத்திய ஒரு திட்டம். 2047-இல் இந்தியா வளர்ச்சியடைந்த நாடாக மாறும். அதற்கு இதுதான் முதல் படி. சந்திரயான் -3 திட்டம் இந்தியர்களுக்கு பெருமை சேர்த்த திட்டம்.
கடந்த 2-ம் தேதி லேண்டர் இயந்திரத்தை இயக்கி, 40 மீட்டர் மேலே உயர்த்தி வேறொரு பீடத்தில் வைத்துள்ளது. வருங்காலத்தில் தாது பொருட்களை எடுத்து வருவதற்கு இது பயன்படும். இதுவும் ஒரு வெற்றிகரமான செயலாகும். சுதந்திரத்துக்கு பின்னர் முதல்முறையாக ராக்கெட் 1967-ம் ஆண்டு தான் அனுப்பினோம். இதனால் மற்ற நாடுகளுடன் இந்தியாவை ஒப்பிட முடியாது. இந்த 60 ஆண்டுகளில் இந்தியா செய்தது உலகமகா சாதனையாகும். இவையனைத்தும் இந்தியா மக்களுக்கு நன்மை பயக்கும் ஒரு திட்டம்.
சந்திரயான்-3 யை நிலவின் தென் துருவத்தில் தரையிறக்கியதனால் முதல் இடத்தில் உள்ளோம். கடந்த 2008-இல் சந்திரயான்-1 திட்டம் மூலம் நிலவில் தண்ணீர் இருப்பதை கண்டுபிடித்தோம். ஒரு வாகனங்கள் 140 செயற்கைக் கோள்களை கொண்டு சரியான இடத்துக்கு கொண்டு சென்றது இந்தியா தான். முதன் முதலில் செவ்வாய் கிரகத்துக்கு இறங்கிய நாடு இந்தியா தான்.
இவையனைத்திலும் இந்தியா முதலிடத்தில் உள்ளது. உலக நாடுகள் அனைத்தும் இதற்காக முயற்சி செய்து வருகின்றது. விண்வெளியில் உலக நாடுகள் சாதனை படைத்திருந்தாலும், அவர்கள் முதல் முறையிலேயே இந்த வெற்றியைப் பெறவில்லை. ஆனால், இந்தியா முதன் முறையிலேயே வெற்றி பெற்றுள்ளது. அதிலும், குறைந்த செலவில் ராக்கெட் ஏவி உள்ளோம்.
நிலாவில் மனிதர்கள் குடியேற வாய்ப்பு உள்ளது என நம்புகிறேன். இதற்கான ஆராய்ச்சிகள் நடந்து வருகின்றன. சந்திரயான்-3-ஐத் தொடர்ந்து ஆதித்யா எல் - 1 என்ற செயற்கைக்கோள் சூரியனை ஆராய்ச்சி செய்ய அனுப்பி உள்ளோம். இந்த செயற்கைக் கோள் 1,480 கிலோ எடை கொண்டது. இதில், 7 விஞ்ஞானக் கருவிகள் உள்ளன. இதனை கடந்த ஆகஸ்ட் 2ஆம் தேதி பி.எஸ்.எல்.வி. - சி57 வாகனத்தில் 19 ஆயிரம் கி.மீ. பயணித்து நீள்வட்டப் பாதைக்கு அனுப்பினோம்.
அதில் இருந்து கொஞ்சம் கொஞ்சமாக நகர்த்தி, ஒரு லட்சத்து 19 ஆயிரம் கி.மீ. கொண்டு சென்றுள்ளோம். வரும் 19-ஆம் தேதி காலையில், அங்கிருந்து சூரியனை நோக்கி அனுப்ப வேண்டும். மேலும் அதனைத் தொடர்ந்து சரியான இடத்தில் நிலை நிறுத்த வேண்டும். அது ஜனவரி மாதம் வரை காலநிர்ணயம் செய்யப்பட்டுள்ளது. உலகத்தில் சூரியனை ஆராய்ச்சி செய்ய அனுப்பி உள்ள 4-வது நாடாக இந்தியா உள்ளது. அடுத்த மாதம் ககன்யான் திட்டத்தின் மூலம் நிலவிற்கு மனிதர்களை அனுப்பும் திட்டமும் தயார்படுத்தப்பட்டு வருகின்றது" எனத் தெரிவித்தார்.
இதையும் படிங்க: உலக கோப்பை துப்பாக்கிச் சூடு: தமிழக வீராங்கனை இளவேனில் வாலறிவன் தங்கம் வென்று அசத்தல்!
