தூத்துக்குடி மாவட்டம், குளத்தூர் காவல் நிலைய எல்லைக்குட்பட்ட பகுதியைச் சேர்ந்தவர் 16 வயது சிறுமி. அதே பகுதியைச் சேர்ந்த சரவணன், வேல்சாமி, குகன் மற்றும் அவர்களது கூட்டாளிகள் இச்சிறுமியைப் பாலியல் சீண்டல் செய்து வந்ததாகக் கூறப்படுகிறது.
இந்நிலையில், சிறுமியின் வீட்டில் யாரும் இல்லாத நேரத்தில், அங்கு மதுபோதையில் வந்த சரவணன், அவருடைய கூட்டாளிகளும் உடலுறவுக்கு உடன்படாவிட்டால், குடும்பத்துடன் தீயிட்டு கொளுத்திவிடுவதாகவும் சிறுமியை மிரட்டி சென்றுள்ளனர். வீட்டில் எவரிடமும் கூறாமல், மன வேதனையடைந்த சிறுமி, தனக்குத்தானே தீவைத்து தற்கொலைக்கு முயற்சி செய்தார்.
அவரது அலறல் சத்தம்கேட்டு வந்த உறவினர்கள் சிறுமியை மீட்டு தூத்துக்குடி அரசு மருத்துவக் கல்லூரி மருத்துவமனையில் சேர்த்தனர். அங்கு அவர் உயிருக்கு ஆபத்தான நிலையில் சிகிச்சை பெற்றுவருகிறார்.
இதனையடுத்து, இச்சம்பவம் குறித்து குளத்தூர் காவல்நிலையத்தில் புகாரளிக்கப்பட்டது. புகாரின் அடிப்படையில் காவல்துறையினர் விசாரணை மேற்கொண்டு வருகின்றனர். இச்சம்பவம் குறித்து சிறுமியின் பெற்றோர் கூறுகையில், சிறுமியைத் தொடர்ந்து பாலியல் தொல்லை செய்து அவளை தற்கொலைக்கு தூண்டியுள்ளனர்.
காவல்நிலையத்தில் புகாரளித்தும், இதுவரை நடவடிக்கை எடுக்கவில்லை. குற்ற சம்பவத்தில் தொடர்புடையவர்கள் இங்கிருந்து வெளியூருக்கு லாரியில் தப்பிச்சென்று விட்டதாகத் தகவல் வருகிறது. எனவே, தலைமறைவானவர்கள் மீது உடனடியாக நடவடிக்கை எடுப்பதோடு, பாதுகாப்பாக வாழ்வதை உறுதிசெய்ய வேண்டும் என்றனர்.
இதையும் படிங்க: கரோனாவுக்கு எதிரான போரில் சவால்விடுக்கும் காரணிகள் யாவை?
