முன்னாள் பிரதமர் ராஜீவ் காந்தி கொலை வழக்கில் 30 ஆண்டுகளுக்கும் மேலாக நளினி, ஜெயக்குமார், ரவிச்சந்திரன், முருகன், சாந்தன், ராபர்ட் பயஸ், பேரறிவாளன் ஆகிய 7 பேரும் சிறை தண்டனை அனுபவித்து வருகின்றனர். இதில் பேரறிவாளன் கடந்த மே மாதம் 18ஆம் தேதி உச்சநீதிமன்றத்தால் விடுதலை செய்யப்பட்டார்.
இந்நிலையில், நேற்று(நவ.11) முன்னாள் பிரதமர் ராஜீவ் காந்தி கொலை வழக்கில் சிறை தண்டனை அனுபவித்து வரும் நளினி உள்ளிட்ட 6 பேரையும் விடுதலை செய்து உச்சநீதிமன்றம் உத்தரவிட்டுள்ளது. இதில் தூத்துக்குடி மாவட்டம், விளாத்திகுளத்தில் உள்ள சூரப்பநாயக்கன்பட்டி கிராமத்தைச் சேர்ந்த ரவிச்சந்திரனும் ஒருவர். பரோலில் உள்ளார். விடுதலை செய்ய நீதிமன்ற உத்தரவிட்டதைத் தொடர்ந்து ரவிச்சந்திரன் குடும்பத்தினர் மகிழ்ச்சியுடன் பொதுமக்களுக்கு இனிப்பு வழங்கினர்.
இதைத் தொடர்ந்து ரவிச்சந்திரன் தாயார் ராஜேஸ்வரி செய்தியாளர்களிடம் கூறுகையில், ’6 பேர் விடுதலை மகிழ்ச்சி தருகிறது. தமிழ்நாடு முதலமைச்சரை சந்தித்து நன்றி தெரிவிக்க உள்ளேன். 32 ஆண்டுகளாக பட்ட கஷ்டத்திற்கு விடுதலை கிடைச்சிருக்கு, என் மகனுக்கு விடுதலை கிடைத்தது சந்தோசமாக இருக்கிறது. ரவிச்சந்திரன் எதிர்காலம் குறித்து அவர்தான் முடிவு செய்ய வேண்டும்" என்றார்.
இதையும் படிங்க: ’இதற்குத் தான் தவிப்போடு காத்துக் கிடந்தோம்..!’ - ஆறு பேர் விடுதலை குறித்து பேரறிவாளன்
