தூத்துக்குடி: திருச்செந்தூர் அருகே உள்ள காயல்பட்டினம் பெரிய நெசவு தெருவில் உள்ள ஒரு காம்ப்ளக்சில் எலக்ட்ரானிக் கடையில் நேற்று(நவ-10) அதிகாலை மர்ம நபர்கள் பூட்டை உடைத்து கடையில் இருந்த விலை உயர்ந்த ஸ்மார்ட் வாட்ச், ப்ளூ டூத், ஸ்பீக்கர் பாக்ஸ் ஆகிவற்றை திருடிச் சென்றுள்ளனர்.
மேலும் அதே காம்ப்ளக்சில் உள்ள டைல்ஸ் கடையில் இருந்த விலை உயர்ந்த செல்போனும் திருடப்பட்டுள்ளது. மேலும் துணிக்கடையின் பூட்டை உடைத்து உள்ளே சென்ற மர்மக்கும்ப கும்பல் ஏதும் கிடைக்காததால் திரும்பிச் சென்றுள்ளனர். இதனையடுத்து திருச்செந்தூர் சாலையில் உள்ள டூ வீலர் ஒர்க் ஷாப்பில் வைத்திருந்த ரூ. 30ஆயிரம் பணத்தையும் திருடிச்சென்றுள்ளனர்.
இதனையடுத்து வீட்டின் முன்பு நிறுத்தப்பட்ட பைக்கையும் திருடிச்சென்றுள்ளனர். எலக்ட்ரானிக் கடையில் மர்ம கும்பல் திருடிய போது அங்கிருந்த கண்காணிப்பு கேமராவில் பதிவான காட்சிகளும், இருசக்கர வாகனத்தை திருடிச் செல்லும்போது தெருவில் இருந்த கண்காணிப்பு கேமராவில் பதிவான காட்சிகளும் வெளியாகி பரபரப்பை ஏற்படுத்தியுள்ளன.
இந்த கண்காணிப்பு கேமராவில் பதிவான காட்சிகளைக் கொண்டு ஆறுமுகநேரி போலீசார் வழக்குப்பதிவு செய்து அந்த மர்ம நபர்களைத் தேடி வருகின்றனர். ஒரே நாளில் நான்கு கடைகளில் பூட்டை உடைத்தும், பைக்கை திருடியும் உள்ள சம்பவம் அந்தப் பகுதியில் பெரும் பரபரப்பை ஏற்படுத்தியுள்ளது.
இதையும் படிங்க:நடு ரோட்டில் பாலியல் தொல்லை,கொடூர தாக்குதல்..! சென்னை பேராசிரியர் கைது..
