2020-21ஆம் ஆண்டிற்கான மத்திய நிதிநிலை அறிக்கையை மத்திய நிதியமைச்சர் நிர்மலா சீதாராமன் நேற்று நாடாளுமன்றத்தில் தாக்கல் செய்தார். அதில் விவசாயம், தனிநபர் வருமான வரி, பொதுதுறை நிறுவனங்கள் சார்ந்து பல்வேறு அறிவிப்புகளை வெளியிட்டுள்ளார்.
இதுகுறித்து டெல்டா மாவட்ட விவசாயிகள் தெரிவித்ததாவது, “பாஜக அரசு ஆட்சியமைத்ததில் இருந்து ஒவ்வொரு நிதி ஆண்டிலும் விவசாயிகளின் வருவானம் இரட்டிப்பாக்கபடும் என அறிவித்து வருகிறது.
அதே இந்தாண்டும் விவசாயிகள் வருமானத்தை இரட்டிப்பாக்கபடும் என கூறியிருந்தது. இது வெறும் அறிவிப்பாக மட்டும் இருக்கிறது அதற்கான எந்த முயற்சிகளையும் மத்திய அரசு மேற்கொள்ளவில்லை.
விவசாயத்திற்கென ரூ.12 ஆயிரத்து 955 கோடி நிதி ஒதுக்கப்பட்டுள்ளது. பெண்களை விவசாயத்தில் ஈடுபடுத்தும் நோக்கில் தானிய லட்சுமி திட்டம், வேளாண் விளைப்பொருட்களை இந்தியா முழுவதும் கொண்டு செல்வதற்காக குளிர்சாதன ரயில் சேவை, ஏற்றுமதி செய்வதற்கு விமான சேவை போன்ற அறிவிப்புகள் வரவேற்க்க கூடியதாக இருந்தாலும், நெல்லுக்கான உற்பத்தி செலவுடன் 50 சதவீதம் லாபம் சேர்த்து கொள்முதல் விலையை நிர்ணயிக்கப்பட வேண்டும் என்ற எம்.எஸ் சுவாமிநாதன் குழுவின் பரிந்துரையை ஏற்க வேண்டும் என்ற விவசாயிகளின் நீண்ட கால கோரிக்கைகளை ஏற்காதது ஏமாற்றத்தை அளித்துள்ளது.
நதி நீர் இணைப்பு, நதி நீர்களை மாநிலங்களுக்கிடையே பிரித்து கொள்வது மாநிலங்களுக்கிடையேயான சர்ச்சையை போக்குவது தொடர்பான எந்த அறிவிப்பும் இல்லை.
பண்ணைத் திட்டம் என்ற பெயரில் ரூ.15 லட்சம் கோடி அறிவிக்கப்பட்டுள்ளது. இதில் கார்பரேட் நிறுவனங்கள் அடங்குகிறதா என்பதை மத்திய அரசு தெளிவுப்படுத்த வேண்டும்.
விவசாயிகளுக்கு என அறிவித்துவிட்டு பெருநிறுவத்திற்கு அந்த நிதிபோய்விடுமோ என்ற அச்சம் ஏற்படுகிறது. மொத்தத்தில் தற்போது அறிவித்திருக்ககூடிய நிதிநிலை அறிக்கை விவசாயிகளுக்கு ஏமாற்றத்தை அளித்துள்ளது என தெரிவிக்கின்றனர்.
இதையும் படியுங்க: பட்ஜெட்டின் தாக்கத்தை உணர திங்கள் வரை காத்திருங்கள்: நிர்மலா சீதாராமன்
