திருவண்ணாமலை: ஆரணி என்றாலே பட்டுக்குப் பெயரெடுத்த ஊராகும். ஆரணி, முள்ளிபட்டு, காமக்கூர், எஸ்.வி.நகரம், சேவூர், ஒண்ணுபுரம், மூனுகபட்டு, நடுக்குப்பம், தேவிகாபுரம் உள்ளிட்ட 100க்கும் மேற்பட்ட கிராமங்களைச் சார்ந்த சுமார் 50 ஆயிரத்திற்கும் மேற்பட்டோர் பட்டு நெசவு தொழிலில் ஈடுபட்டு வருகின்றனர்.
பட்டுப் பூச்சி வளர்ப்பு, பட்டு வடிவமைப்பு, நெசவாளர் பட்டு, சாயப்பட்டறை உள்ளிட்ட தொழில் சார்ந்து பட்டு உற்பத்தி நடைபெற்று வருகின்றது.
மேலும் கரோனா தொற்று பரவல் காரணமாக ஊரடங்கு உத்தரவு பிறப்பிக்கப்பட்டது. இதனால் சென்னை, பெங்களுர், ஜதராபாத் உள்ளிட்ட முக்கிய நகரங்களில் உள்ள ஜவுளிக்கடைகள் மூடப்பட்டன. இதனால் ஆரணியில் உள்ள பட்டுச் சேலை உற்பத்தியாளர்கள் மற்றும் நெசவாளர்கள் மிகவும் பாதிப்படைந்தனர்.
இதனையடுத்து ஜவுளிக் கடைகள் திறக்கப்பட்டதால் நெசவாளர்கள் தங்களது பணியைத் தொடங்கினார்கள். மேலும் வருகின்ற 24ஆம் தேதி தீபாவளி பண்டிகை என்பதால் தீபாவளிக்காக புத்தம் புதிய வண்ணமயமான பட்டுச் சேலை ரகங்களை நெசவாளர்கள் உற்பத்தியாளர்கள் இணைந்து தீவிரமாகப் பட்டுச் சேலை உற்பத்தியில் தற்போது ஈடுபட்டுள்ளனர்.
இந்தாண்டு தீபாவளிக்குப் பட்டுச் சேலையில் வெள்ளி ஜரிகையுடன் கூடிய விதவிதமான பட்டு ரகங்களும், தமிழர்களின் பாரம்பரியமான விவசாயிகள் ஏர் பிடிக்கும் சேலைகள், ரவிவர்மா ஓவியம் பொருத்தப்பட்ட சேலைகள், கிருஷ்ணன் ராதை சேலைகள், இந்தியாவின் நினைவுச் சின்னமான தாஜ்மகால் ஓவியம் பொருத்தப்பட்ட சேலைகள் என நெசவுத் தொழிலாளர்கள் உற்பத்தி செய்து வருகின்றனர்.
இதுபோன்ற ரகங்கள் பெண்கள் மத்தியில் மிகவும் வரவேற்பு பெற்று உள்ளது. சென்னை, கோயம்புத்தூர், சேலம் உள்ளிட்ட வெளி மாவட்டங்களிலும் ஐதராபாத், பெங்களுர், கேரளா உள்ளிட்ட வெளி மாநிலத்திலிருந்தும் வாடிக்கையாளர்கள் ஆரணிக்கு வந்து புத்தம் புதிய சேலைகளை மகிழ்ச்சியுடன் வாங்கி செல்கின்றனர்.
கரோனாவால் பட்டு நெசவு தொழில் மிகவும் பாதிக்கப்பட்டாலும் இந்தாண்டு பல்வேறு வகையான ரகங்களில் பட்டு உற்பத்தியாளர்கள் ஈடுபட்டு வந்தாலும், விலை ஏற்றத்தின் காரணமாக மேலும் பல்வேறு புதிய ரகங்களை உருவாக்குவதில் சிரமம் உள்ளதாகவே பட்டுச் சேலை உற்பத்தியாளர்கள் தெரிவிக்கின்றனர்.
இதுமட்டுமின்றி பட்டு மற்றும் ஜரிகையின் விலைகள் வரலாறு காணாத அளவிற்கு அதிகமாகி உள்ளதால் பட்டுச் சேலையின் விலையும் அதிகரிக்கும் என்பதாலேயே பொதுமக்கள் கைத்தறி பட்டை வாங்குவதில் சுணக்கம் காட்டுவதாகவும், தமிழக அரசு நெசவு தொழில் செய்பவர்கள் மீது தனி அக்கறை செலுத்திப் பட்டு உற்பத்தியாளர்களைக் காக்க வேண்டும்.
குறிப்பாக விவசாயிகளுக்கு வழங்குவது போல் கூட்டுறவு வங்கிகளில் குறைந்த வட்டிக்குப் பட்டு நெசவு செய்யும் தொழிலாளர்களுக்குக் கடன் வழங்கினால் அவர்களின் வாழ்வாதாரம் மேம்படும் என்றும், புதிய ரகங்களை உருவாக்க ஏதுவாக இருக்கும் என்பதே பட்டுச் சேலை உற்பத்தியாளர்களின் கோரிக்கையாக உள்ளது.
இதையும் படிங்க: மீசையில் படாமல் கூழ்குடித்து போராடிய விவசாயிகள் - காரணம் இதுதான்..!
