தேனி மாவட்டத்தில் தற்போது தென்மேற்கு பருவக்காற்று வீசத் தொடங்கியுள்ளது. மேற்குத்தொடர்ச்சி மலையில் இருந்து வீசும் காற்று நாளுக்கு நாள் அதிகரித்து வருவதால் காற்றாலை மின் உற்பத்தி அதிகரித்துள்ளது.
தேனி மாவட்டத்தில் ஆண்டிபட்டி, கண்டமனூர், கடமலைக்குண்டு, அம்பாசமுத்திரம், கோவிந்தநகரம், வெங்கடாசலபுரம், உத்தமபாளையம், போடி, தேவாரம் உள்ளிட்ட பகுதிகளில் அமைக்கப்பட்டுள்ள சுமார் 500க்கும் மேற்பட்ட காற்றாலைகளில், தற்போது மின் உற்பத்தி அதிகரித்துள்ளது.
தென்மேற்கு பருவக்காற்று தொடங்கியதால், காற்றின் வேகம் வினாடிக்கு 9 மீட்டரில் இருந்து 10 மீட்டர் அளவில் அதிகரித்துள்ளது. இதனால் நாளொன்றுக்கு ஒரு காற்றாலையில் சுமார் 12 ஆயிரத்தில் இருந்து 13 ஆயிரம் யூனிட் வரை மின் உற்பத்தியாகிறது.
கடந்த சில வாரங்களாக படிப்படியாக அதிகரித்து வந்த காற்றாலை மின் உற்பத்தி, தற்போது 250 மெகாவாட்டை தாண்டியுள்ளது.
