தேனி மாவட்டம் சின்னமனூர் ஜக்கம்மாள் கோயில் தெருவைச் சேர்ந்தவர் கிருஷ்ணன் என்பவருடைய மகன் அழகுமலை (29). கூலித் தொழிலாளியான இவருக்கு திருமணம் முடிந்து மனைவி, மகன், மகள் உள்ளனர். கடந்த சில தினங்களுக்கு முன் அழகுமலை வளர்த்து வந்த ஜல்லிக்கட்டுக் காளை அதே பகுதியைச் சார்ந்த அய்யாசாமி என்பவருடைய கரும்பு தோட்டத்திற்குள் மேய்ந்ததாக கூறப்படுகிறது.
இதுகுறித்து சின்னமனூர் காவல் நிலையத்தில் அளிக்கப்பட்ட புகாரில், மாடு மேய்ந்தற்காக அழகுமலை தரப்பில் பணம் தருவதாக கூறியதாக தெரிகிறது. மேலும் மாடு மேய்ந்ததன் காரணமாக இருவருக்கு இடையே தொடர்ந்து முன்விரோதம் இருந்து வந்துள்ளது. இந்நிலையில் அழகுமலை வீட்டில் இருந்தபோது, அய்யாசாமி குடும்பத்தினர் வந்து தகராறு செய்து கத்தி, கற்களை கொண்டு தாக்கியுள்ளனர்.
அவர்களிடம் தப்பி ஓடிய அழகுமலை அவர் வீட்டின் அருகேயுள்ள கோயில் வரை சென்றபோது, விரட்டி அந்த கும்பல் சரமாரியாக தாக்கியது. தடுக்க வந்த அழகுமலையின் தந்தை கிருஷ்ணன் உள்பட அவர் சகோதரன் அஜித் என்பவரையும் அக்கும்பல் தாக்கியது. இதில் ரத்த வெள்ளத்தில் சாய்ந்த அழகுமலை சம்பவ இடத்திலேயே உயிரிழந்தார்.
தகவலறிந்து சம்பவ இடத்திற்கு வந்த சின்னமனூர் காவல்துறையினர் இறந்த அழகுமலையின் உடலை கைப்பற்றி உடற்கூற் ஆய்விற்காக தேனி அரசு மருத்துவமனைக்கு அனுப்பி வைத்தனர். படுகாயம் அடைந்த அழகுமலையின் தந்தை கிருஷ்ணன் சிகிச்சைக்காக மருத்துவமனையில் அனுமதிக்கப்பட்டுள்ளார். மேலும், காயம் அடைந்த அஜித்தை சின்னமனூர் அரசு மருத்துவமனையில் சிகிச்சைக்காக சேர்த்தனர்.
இந்தக் கொலை சம்பவம் தொடர்பாக சின்னமனூர் காவல்துறையினர் வழக்குப்பதிவு செய்து அய்யாச்சாமி மனைவி பழனியம்மாள், சுரேஷ்குமார், அருண்குமார் ஆகியோரை கைது செய்து விசாரணை மேற்கொண்டு வருகின்றனர்.
இதையும் படிங்க: வெடிகுண்டு வீசி காவலரை கொன்ற ரவுடிக்கு ஆதரவாக பேஸ்புக் பதிவு; ஆயுதப்படை காவலர் சஸ்பெண்ட்
