முல்லைப் பெரியாறு அணையில் இருந்து தமிழ்நாட்டிற்கு மீண்டும் தண்ணீர் திறப்பு

வைகை அணையின் நீர்மட்டம் முழுக்கொள்ளளவை எட்டியதால் முல்லைப் பெரியாறு அணையில் ஒரு வாரமாக நிறுத்தப்பட்டிருந்த தண்ணீர் மீண்டும் திறக்கப்பட்டுள்ளது.

தேனி: கேரள மாநிலம் தேக்கடியில் அமைந்துள்ளது முல்லைப் பெரியாறு அணை. தென் மாவட்டங்களின் முக்கிய நீராதாரமாகத் திகழும் இந்த அணையில் இருந்து திறக்கப்படும் தண்ணீரால் கம்பம் பள்ளத்தாக்கில் உள்ள 14,707 ஏக்கர் பாசன நிலங்கள் நேரடியாக இருபோக சாகுபடி பெறுகின்றன.

மேலும் முல்லைப் பெரியாறு அணையில் இருந்து வெளியேற்றப்படும் தண்ணீர் ஆண்டிபட்டி அருகே உள்ள வைகை அணையில் தேக்கி வைக்கப்பட்டு, அங்கிருந்து தேனி, மதுரை, திண்டுக்கல், சிவகங்கை மற்றும் இராமநாதபுரம் ஆகிய 5 மாவட்டங்களின் குடிநீர் மற்றும் பாசனத்திற்காக தண்ணீர் திறக்கப்படுகிறது.
கடந்த ஜனவரி இரண்டாவது வாரத்தில் பெய்து வந்த தொடர் மழையால் முல்லைப் பெரியாறு மற்றும் வைகையின் நீர்ப்பிடிப்பு பகுதிகளில் நீர்வரத்து அதிகரித்து அணைகளின் நீர்மட்டம் கிடுகிடுவென உயரத்தொடங்கியது. இதன் காரணமாக 71அடி உயரம் கொண்ட வைகை கடந்த ஜனவரி 16ஆம் தேதி அதன் முழுக்கொள்ளளவை நெருங்கியது. மேலும் முல்லைப் பெரியாறு அணையின் நீர்மட்டமும் 132அடி வரை உயர்ந்தது.
இதனிடையே பெரியாறு - வைகை பாசன பங்கீட்டு பகுதிகளுக்கான தண்ணீர் சென்றடைந்ததால் முல்லைப் பெரியாறு அணையில் இருந்து திறக்கப்படும் நீரின் அளவு படிப்படியாக குறைக்கப்பட்டது. தொடர்ந்து மூலவைகை, கொட்டக்குடி, சுருளியாறு உள்ளிட்ட நீர்நிலைகளில் இருந்தும் நீர் வரத்து அதிகரித்தே காணப்பட்டது.

இதன் காரணமாக கடந்த ஜனவரி 16ஆம் தேதி முதல் முல்லைப் பெரியாறு அணையில் இருந்து தமிழ்நாட்டிற்கு திறக்கப்படும் தண்ணீர் முற்றிலும் நிறுத்தப்பட்டது. தேனி மாவட்ட குடிநீருக்காக மட்டும் விநாடிக்கு 100கன அடி நீர் நாள்தோறும் வெளியேற்றப்பட்டு வந்தது.
இந்நிலையில் வைகையின் நீர்வரத்து குறையத் தொடங்கியதால் முல்லைப் பெரியாறு அணையில் இருந்து நேற்று முதல் மீண்டும் தண்ணீர் திறக்கப்பட்டுள்ளது.

விநாடிக்கு 600கன அடி வீதம் இறைச்சல் பாலம் வழியாகவே தண்ணீர் வெளியேற்றப்படுகிறது. நேற்றுமுன்தின காலை நிலவரப்படி முல்லைப் பெரியாறு அணையின் நீர்மட்டம் 132.90அடியாகவும், நீர் இருப்பு 5,376மி. கன அடியாக இருக்கிறது. நீர் வரத்து 592கன அடியாக உள்ளது. இதேபோல் வைகை அணையின் நீர் மட்டம் 69.72அடியாகவும், நீர் இருப்பு 5,758மி.கன அடியாகவும் இருக்கிறது. விநாடிக்கு 721கன அடி நீர் வரத்துள்ள நிலையில் 1,469கன அடி நீர் வெளியேற்றப்படுகிறது.
முல்லைப் பெரியாறு அணையில் இருந்து 4 ராட்சத குழாய் வழியாக குறைந்தது 1200கன அடி நீர் வெளியேற்றப்பட்டால் மட்டுமே லோயர்கேம்ப் பெரியாறு மின் நிலையத்தில் உற்பத்தி நடைபெறும். தற்போது இறைச்சல் பாலம் வழியாக 600கன அடி மட்டும் திறக்கப்படுவதால் அங்கு மின் உற்பத்தி நிறுத்தப்பட்டுள்ளது.