தேனி: பெரியகுளம் ஊராட்சி ஒன்றியத்துக்கு உட்பட்ட ஜல்லிபட்டி ஊராட்சியில் அமைந்துள்ளது, கெண்டிக்காரன்பட்டி கிராமம். இந்த கிராமத்தில் சுமார் 100க்கும் மேற்பட்ட குடும்பங்கள் வசித்து வருகின்றனர். மேலும் குழந்தைகளின் படிப்பிற்கும், மருத்துவத் தேவைக்கும் பொதுமக்கள் அருகில் உள்ள கிராமத்திற்குச் செல்லும் நிலை தற்போது வரை நிலவி வருகிறது.
இந்த நிலையில், கெண்டிக்காரன்பட்டி கிராமத்திற்கு முன்பு கண்மாயில் இருந்து வரும் ஓடை நீர் செல்வதால், அதனைக் கடந்துதான் கிராமத்திற்குச் செல்ல வேண்டிய நிலை இருக்கின்றது. இதனால் சிறு குழந்தைகள், பெரியவர்கள் என அனைவருக்கும் காய்ச்சல், சளி போன்ற தொற்று நோய்கள் ஏற்பட்டு வருவதாகவும் கூறுகின்றனர்.
மழை பெய்ததால், மழைக் காலங்களில் தண்ணீர் அதிகரித்து, அப்பகுதியினர் கிராமத்திற்குச் செல்ல முடியாத நிலை ஏற்பட்டுவிடும் எனக் கூறும் அப்பகுதி மக்கள், நீர் ஓடையைக் கடக்க பாலம் அமைக்க வேண்டும் என கோரிக்கை வைத்துள்ளனர். அதனை ஏற்று ஊராட்சி நிர்வாகம், கடந்த ஆண்டு பாலம் கட்டும் பணியைத் தொடங்கி உள்ளது. மகாத்மா காந்தியின் தேசிய ஊரக வளர்ச்சித் திட்டத்தின் கீழ், ரூ.25 லட்சம் நிதி ஒதுக்கப்பட்டு பாலம் கட்டி முடித்ததாகக் கூறி, ஊராட்சி நிர்வாகம் சார்பில் அதற்கு திட்ட மதிப்பு பலகையும் வைக்கப்பட்டுள்ளதாக கூறப்படுகிறது.
இந்நிலையில், பாலம் கட்டப்பட்டதால் இனி ஓடையைக் கடக்கத் தேவையில்லை என மகிழ்ச்சியில் இருந்த கிராம மக்களுக்கு, பாலத்தில் ஏறி செல்வதற்கான வழி எங்கே இருக்கின்றது என தேடும் நிலைக்கு தள்ளப்பட்டுள்ளனர். பாலம் மட்டும் கட்டிவிட்டு அதற்கான வழியை ஏற்படுத்தித் தராமல், அந்தரத்தில் தொங்கும் பாலத்தில் எப்படி கடந்து செல்வது என ஊர் மக்கள் கேள்வி எழுப்பி வருகின்றனர். சுமார் 25 லட்சம் ரூபாய் மதிப்பீட்டில் பாலம் கட்டி, அதற்கு உண்டான வழியை ஏற்படுத்தித் தராமல், மீண்டும் ஓடையைக் கடந்து செல்லும் நிலைக்கு தள்ளப்பட்டுள்ளதாக கிராம மக்கள் வேதனை தெரிவிக்கின்றனர்.
எனவே, பாலத்திற்கு உண்டான வழியை ஊராட்சி நிர்வாகம் ஏற்படுத்தி தர வேண்டும் என கிராம மக்கள் கோரிக்கை வைத்து வருகின்றனர். இது குறித்து ஊராட்சி நிர்வாகத்திடம் கேட்டபோது, போதுமான நிதி இல்லாததால் பாலம் இணைக்கப்படவில்லை என்றும், ஓரிரு வாரங்களில் அதனை சரி செய்து விடுவோம்" எனவும் தெரிவித்துள்ளனர்.
இதையும் படிங்க: குன்னூர் பகுதியில் உலாவும் யானைகள்..பாதுகாப்பாக இருக்க வனத்துறை எச்சரிக்கை
