தேனி மாவட்டம் குரங்கணி அருகே உள்ளது முதுவார்க்குடி மலைக்கிராமம். மா, இலவம், எலுமிச்சை உள்ளிட்ட விவசாயப் பணிகளை இப்பகுதியில் வசிக்கும் பழங்குடியின மக்கள் செய்து வருகின்றனர். துணை முதலமைச்சர் ஓ. பன்னீர்செல்வத்தின் போடி சட்டப்பேரவை தொகுதிக்குட்பட்ட இந்த மலைக்கிராமத்திற்கு சாலைப் போக்குவரத்து வசதியில்லை. ஆதலால், அரிசி, மளிகை உள்ளிட்ட அத்தியாவசியப் பொருள்களை போடியிலிருந்து வாங்கி வந்து குரங்கணியிலிருந்து குதிரை, கழுதைகள் உதவியுடன்தான் தங்களது வசிப்பிடத்திற்கு அம்மக்கள் எடுத்துச் செல்வர்.
இந்நிலையில், ஊரடங்கு உத்தரவால் இக்கிராம மக்களுக்கு அத்தியாவசியப் பொருள்கள் கிடைப்பதில் சிரமம் ஏற்பட்டது. குடும்ப அட்டை உள்ள மலைக்கிராம மக்கள் நியாய விலைக்கடையில் அரசின் நிவாரணப் பொருள்களைப் பெற்றுக் கொண்டனர். அட்டை இல்லாதவர்களால் அரசின் உதவித்தொகை, ரேசன் பொருள்களை வாங்க முடியாத சூழ்நிலை இருந்தது.
இதையறிந்த ஓ. பன்னீர்செல்வம் குடும்ப அட்டை இல்லாத பயனாளிகளை கணக்கெடுத்து அவர்களுக்குத் தேவையான அரிசி, பருப்பு, மளிகைப் பொருள்களை உடனே வழங்குமாறு அம்மாவட்ட அதிமுகவினருக்கு உத்தரவிட்டார். அதனடிப்படையில் தேனி மாவட்ட அம்மா பேரவை சார்பில், அப்பகுதி மக்களுக்கு அத்தியாவசியப் பொருள்கள் வழங்கப்பட்டன.
இந்தப் பொருள்கள் அனைத்தையும் குரங்கணியிலிருந்து குதிரைகள் மூலம் முதுவார்க்குடி கிராமத்திற்கு வனத்துறை அலுவலர்களின் அனுமதியுடன் தேனி மாவட்ட அதிமுகவினர் அனுப்பி வைத்தனர்.
இதையும் படிங்க: ஊரடங்கு உத்தரவு: உணவின்றி தவிக்கும் நரிக்குறவர்கள்!
