தேனி மாவட்டம் போடிநாயக்கனூர் மலைப்பகுதியில் ஊத்தம்பாறை ஆறு அமைந்துள்ளது. இந்தப் பகுதிக்கு இளைஞர்கள் அதிக அளவில் வந்து குளித்துச் செல்கின்றனர். இந்நிலையில் போடியில் மின்சாரத் துறையில் பணிபுரியும் 4 பேர் உத்தம்பாறை ஆற்றில் குளிக்கச் சென்றனர்.
அவர்கள் குளித்துக் கொண்டிருக்கும்போது ஆற்றின் நீரோட்டம் அதிகமானதால் நீந்த முடியாமல் ஆற்றின் வெள்ளத்தில் தத்தளித்தனர். பின்னர் பாண்டியராஜன் (26), குமரேசன் (32), சுரேஷ் (22) ஆகிய மூன்று பேர் ஆற்றின் மறுபக்கம் உள்ள கரைக்கு சென்றனர். ஆற்றின் வெள்ளத்தை நீந்த முடியாமல் கோகுல் (22) அடித்துச் செல்லப்பட்டார்.
தகவல் அறிந்து சம்பவ இடத்திற்கு வந்த தீயணைப்பு துறையினர் ஆற்றின் மறுகரையில் சிக்கிய மூன்று பேரை கயிறு கொண்டு தீவிர முயற்சிக்கு பின் காப்பாற்றினர். ஆற்றில் அடித்துச் செல்லப்பட்ட கோகுலை தேடும் பணி தீவிரமாக நடைபெற்று வருகிறது.
இதையும் படிங்க: நெல்லை அருகே வம்பிழுத்த காமெடி நடிகர்: கார் கண்ணாடி உடைப்பு
