உதகை அருகே உள்ள கல்லட்டி அருவி கடந்த சில ஆண்டுகளாக போதிய பராமரிப்பின்றி காணப்படுகிறது. ஆனாலும் இந்த அருவியை ரசிக்க சுற்றுலாப் பயணிகள் வந்துசெல்கின்றனர். இந்த நிலையில் உதகையைச் சேர்ந்த சாமுவேல், கணேசன், சுந்தரமூர்த்தி, பரத் உள்ளிட்ட 7 இளைஞர்கள் கல்லட்டி அருவியைக் காண சென்றுள்ளனர்.
அதில் கணேசன், சாமுவேல் ஆகிய இருவரும் நீரில் இறங்கி குளித்துள்ளனர். அப்போது அவர்கள் இருவரும் தண்ணீரில் மூழ்கி தத்தளித்தனர். அதனைக் கண்ட மற்ற நண்பர்கள் காப்பாற்ற முயன்றுள்ளனர். ஆனால் தண்ணீரில் மூழ்கிய இருவரையும் மீட்க முடியவில்லை.
இருவரும் நீரில் மூழ்கி இறந்ததை அறிந்த சக நண்பர்கள் உடனடியாக புதுமந்து காவல் துறையினருக்குத் தகவல் தெரிவித்தனர். சம்பவ இடத்திற்கு விரைந்துவந்த தீயணைப்புத் துறையினர், காவல் துறையினர் அவர்களின் உடல்களைத் தேடும் பணியில் ஈடுபட்டனர். ஆனால் இருவரின் உடல்களையும் கண்டுபிடிக்க முடியவில்லை. இதனையடுத்து உடல்களை மீட்கும் பணி நாளை காலை வரை ஒத்திவைக்கப்பட்டுள்ளது.
